
Komiteti Ekzekutiv i Federatës Shqiptare të Futbollit ka miratuar, në mbledhjen e radhës, në parim bashkëpunimin me Klubin e Futbollit Shkodra dhe shoqërinë FERAMARK sh.p.k. për ndërtimin e një kompleksi sportiv me dy fusha futbolli në qytetin e Shkodrës.
Projekti parashikon ndërtimin e një fushe me bar natyral dhe një fushe me bar artificial, të cilat do t’i shërbejnë zhvillimit të futbollit në qytet dhe do të krijojnë kushte më të mira për stërvitjen e ekipeve.
Investimi merr rëndësi të veçantë edhe në kuadër të organizimit të Kampionatit Europian U-21 në qershor 2027, ku Shkodra është një nga qytetet pritëse dhe kompleksi i ri do të shërbejë si infrastrukturë stërvitore për ekipet pjesëmarrëse.
Në kuadër të këtij bashkëpunimi, KF Shkodra dhe investitori privat do të kontribuojnë me sigurimin e truallit, rrethimin, ndërtimin e bazamenteve të fushave, si edhe me punimet brenda kompleksit.
FSHF do të mbështesë realizimin e dy fushave përmes shtrimit të tapetit artificial në njërën prej tyre, ndërsa për fushën me bar natyral do të kryejë shtresën përfundimtare të bazamentit, instalimin e sistemit të vaditjes, vendosjen e portave në të dyja fushat dhe mbjelljen e barit. Gjithashtu, FSHF do të sigurojë mirëmbajtjen e fushave deri në përfundim të kompeticionit, si edhe pajisjen me makineritë e nevojshme për mirëmbajtjen e tyre.
Ky investim është një tjetër kontribut në kuadër të projektit “100 Fushat” të FSHF-së, duke synuar zgjerimin dhe përmirësimin e infrastrukturës futbollistike në vend, si dhe krijimin e më shumë mundësive për zhvillimin e futbollit në Shkodër.
Ndërkohë, edhe futbolli në zonën e Bushatit do të ketë së shpejti kushte më të mira për zhvillim, falë projektit për rikonstruksionin e fushës ekzistuese dhe shndërrimin e saj në një impiant me bar artificial. Nisma vjen përmes bashkëpunimit mes Federatës Shqiptare të Futbollit dhe Bashkisë Vau Dejës, në funksion të Klubit të Futbollit Basania dhe komunitetit të zonës.
Komiteti Ekzekutiv i FSHF-së miratoi në mbledhjen e radhës kontributin e Federatës në këtë projekt, i cili parashikon gjithashtu sistemin e drenazhimit dhe ndërtimin e një tribune për tifozët.
Bashkia Vau Dejës do të realizojë punimet për bazamentin, drenazhimin dhe tribunën, ndërsa FSHF do të sigurojë tapetin me bar artificial, pajisjet e mirëmbajtjes, portat dhe flamujt e këndit.
Përmes këtij investimi, FSHF vijon bashkëpunimin me pushtetin vendor për përmirësimin e infrastrukturës sportive dhe krijimin e kushteve më të mira për futbollin në çdo zonë të Shqipërisë.




