Vaji i ullirit mbetet pa treg/ Prodhuesit kërkojnë ndalimin e importeve deri në janar, çmimet e ulëta nuk mbulojnë kostot

20/11/2026 17:04

Fermerët e ullirit këtë vit kanë sasi, por jo çmim. 

Një litër vaj ulliri po shitet me 4 500 lekë të reja. Sipas fermerëve, ky çmim nuk mbulon as kostot e prodhimit, të cilat janë tepër të larta për fermerin shqiptar, krahasuar me kolegun e tij në rajon.

Por çmimi i lirë i vajit të ullirit nuk po tërheq klientët e mëdhenj, pronarët e marketeve, të cilët, përpara produktit “Made in Albania”, zgjedhin produktin e importit. Përballë kësaj krize tregtare, Shoqata e Prodhuesve të Vajit të Ullirit, AFI, kërkon që dogana shqiptare t’i vendosë traun vajit të ullirit të huaj.

“Marrjen e masës së menjëhershme të ndalimit të vajit të ullirit deri në fund të janarit”.

“Fermerët e ullirit gjithashtu kërkojnë që të vendosen rregulla edhe në tregti”.

“Të gjitha subjektet që kanë marrë mbështetje nga fondet publike në 5 vitet e fundit nga AZHBR-ja apo kanë marrë lehtësira fiskale si investitorë strategjikë etj., kanë detyrimin që deri në muajin qershor të blejnë vetëm vaj ulliri shqiptar të certifikuar sipas skemës së ndërtuar nga Ministria e Bujqësisë”.

Në rast të mosrespektimit të këtij rregulli, ndaj këtyre subjekteve do të merren 2 masa:

Për çdo blerje të vajit me origjinë jo shqiptare, ndaj tyre do të aplikohet një tarifë e barabartë me vlerën e blerjes së vajit të ullirit me origjinë jo shqiptare.

Subjektet që nuk respektojnë këtë masë emergjente për mbështetjen e fermerëve shqiptarë do të përjashtohen për 5 vjet nga çdo aplikim për marrjen e fondeve nga AZHBR-ja apo përfitimin e lehtësirave të tjera fiskale në kuadër të legjislacionit nxitës turistik.”

Në fund të deklaratës, ata kërkojnë që Ministria e Bujqësisë të ngrejë një task-forcë të përbërë nga fermerë të ullirit. Sipas fermerëve, nëse qeveria nuk ndërhyn për të mbështetur prodhuesit e këtij produkti, atëherë ata do të detyrohen të braktisin tokat shekullore të ullirit.

Top Channel