Mund të kujdeseni për ushqimin, të bëni aktivitet fizik dhe të përpiqeni të ruani një stil jetese të shëndetshëm, por ka edhe faktorë të tjerë që mund të ndikojnë në mënyrën se si plaket trupi juaj. Sipas një studimi të ri, vetmia dhe izolimi shoqëror mund të lidhen me një plakje biologjike më të shpejtë.

Studimi, i publikuar në revistën shkencore “Health Psychology”, analizoi të dhënat e më shumë se 309 mijë të rriturve në Mbretërinë e Bashkuar, të ndjekur për një periudhë mesatare prej rreth 14 vitesh.

Studiuesit shqyrtuan lidhjen mes marrëdhënieve shoqërore dhe moshës biologjike, e cila tregon se sa i vjetër duket organizmi në bazë të treguesve në gjak, krahasuar me moshën reale të një personi.

1. Izolimi shoqëror

Të qenit i shkëputur nga të tjerët mund të ketë pasoja që shkojnë përtej mirëqenies emocionale. Sipas studimit, personat më të izoluar shoqërisht kishin një moshë biologjike rreth katër muaj më të madhe krahasuar me ata që kishin më shumë kontakte shoqërore.

Studiuesit morën parasysh faktorë si të jetuarit vetëm, shpeshtësia e takimeve me miqtë dhe familjarët, si dhe pjesëmarrja në aktivitete në grup.

2. Ndjenja e vetmisë
 
Edhe ndjenja e vetmisë u lidh me një plakje biologjike më të shpejtë. Personat që ndiheshin të vetmuar rezultuan biologjikisht rreth tre muaj më të moshuar se ata që nuk raportonin të njëjtën ndjenjë.

 Pra, nuk ka rëndësi vetëm sa njerëz kemi përreth, por edhe nëse ndihemi të lidhur emocionalisht me ta dhe kemi dikë me të cilin mund të ndajmë shqetësimet tona.

Çfarë tregoi studimi për rrezikun e vdekjes?
Studiuesit shqyrtuan gjithashtu lidhjen mes izolimit, vetmisë dhe vdekshmërisë. Çdo pikë shtesë në shkallën e izolimit shoqëror lidhej me një rritje prej gati 14% të rrezikut të vdekjes nga çdo shkak, ndërsa çdo pikë shtesë në shkallën e vetmisë lidhej me një rritje prej gati 9%.

Megjithatë, është e rëndësishme të theksohet se këto janë lidhje statistikore dhe jo prova se vetmia apo izolimi shkaktojnë drejtpërdrejt këto pasoja.

Si mund të kujdeseni për veten?
Ekspertët sugjerojnë disa zakone të thjeshta që mund të ndihmojnë në ruajtjen e lidhjeve shoqërore:

Merrni pjesë në aktivitete të përbashkëta, si ecjet në grup apo klasat e aktivitetit fizik.

Organizoni takime të rregullta me miqtë dhe familjarët.

Mbani afër njerëz me të cilët mund të ndani mendimet dhe shqetësimet tuaja.

 Kërkoni mbështetje profesionale nëse ndjenja e vetmisë vazhdon.