E premte, 20 nëntor 2026 DENONCO ANONIM Denonco: +355 69 20 95 843
PUBLIK PUBLIK
Çakërri propozon ndryshimin e ligjit të AKSHI-t, Brahaj: Hapet rruga për kontrata dhe pagesa pa garë, skemë më e rëndë se KAYO
Lajme

Çakërri propozon ndryshimin e ligjit të AKSHI-t, Brahaj: Hapet rruga për kontrata dhe pagesa pa garë, skemë më e rëndë se KAYO

Një tjetër nismë ligjore e lidhur me institucionet shtetërore po ngre pikëpyetje për mënyrën se si do të menaxhohen fondet publike dhe do të jepen kontratat. Këtë herë në qendër është projektligji për ndryshimin e ligjit për Qeverisjen Elektronike, i propozuar nga deputetja socialiste Briseida Çakërri.

Sipas analizës së ekspertes dhe drejtoreshës së qendrës AIS, Aranita Brahaj, ndryshimet e propozuara krijojnë mundësinë që operatorët shtetërorë të blejnë licenca në fushën e teknologjisë së informacionit dhe komunikimit, pa iu nënshtruar procedurave të prokurimit publik.

Brahaj e konsideron këtë mekanizëm edhe më problematik se modeli KAYO. Sipas saj, ndërsa në rastin e KAYO-s ekzistonin disa rregulla për kontraktimin brenda sektorit shtetëror, drafti i ri nuk parashikon as procedura prokurimi dhe as mekanizma të posaçëm kontrolli për blerjet.

Ekspertja paralajmëron se në këtë mënyrë procesi mund të reduktohet në katër hapa: miratimi i ligjit, lidhja e kontratës, kalimi i pagesave dhe vijimi i efekteve financiare edhe përtej vitit buxhetor kur është nënshkruar marrëveshja.

Një tjetër shqetësim lidhet me mungesën e verifikimit nëse shërbimet mund të ofrohen nga vetë institucionet shtetërore, si dhe me shmangien e konsultimit publik për shkak se nisma është paraqitur nga një deputete.

Për të ilustruar rrezikun e pagesave të shpejta pa konkurrencë, Brahaj sjell si shembull kontratën me kompaninë turke Baykar Makina, të nënshkruar në dhjetor 2022. Vetëm dy ditë pas firmosjes, Forca Ajrore urdhëroi pagesën e rreth 989.1 milionë lekëve për atë vit.

Në përfundim, ekspertja ngre dyshime për interesat që mund të qëndrojnë pas kësaj nisme, duke paralajmëruar se ndryshimet e propozuara mund të hapin rrugën për kontrata dhe pagesa të fondeve publike pa garë dhe pa filtrat e zakonshëm të kontrollit.

Na ndiqni në YouTubeVideo, intervista dhe transmetime nga PUBLIK TV Abonohu

Keni një histori? Denonco anonimisht, identiteti juaj mbrohet.

Denonco
DENONCO

Zëri yt bëhet lajm.

Bëhu pjesë aktive e Publik.al. Raporto çdo padrejtësi, korrupsion apo ngjarje, me foto dhe video. Identiteti yt mbrohet nga redaksia.