Emisioni “Review” në Euronews ka rikthyer këtë të premte në vëmendje aksidentin tragjik të 3 majit 2026 në Durrës, ku humbën jetën dy të mitur dhe mbeti i plagosur një tjetër.
Ngjarja është rikthyer në fokus në një kohë kur në Gjykatën e Shkallës së Parë të Durrësit ka nisur procesi gjyqësor ndaj 57-vjeçarit Nikoll Radaçi, i cili akuzohet për aksidentin me pasoja fatale.
Në një intervistë për Euronews, nëna e Eneas, 12-vjeçarit që humbi jetën nga përplasja, ka kërkuar dënimin maksimal për të pandehurin. Ajo tregoi se deri më tani janë zhvilluar tri seanca gjyqësore dhe se familja pret datën e seancës së radhës.
“Kemi zhvilluar tre seanca deri tani dhe presim kur të na thërrasin për seancën tjetër. Kërkoj që shteti të marrë masat, që ai të marrë dënimin maksimal që i takon, që edhe fëmijët tanë, jo se më jep një ngushëllim, por sadopak të gjejnë paqe atje ku janë, sepse unë nuk gjej ngushëllim askund”, tha ajo.
E pyetur nëse familjarët e 57-vjeçarit kishin kontaktuar me ta apo kishin shkuar për t’u kërkuar falje pas tragjedisë, nëna e 12-vjeçarit u shpreh se nuk kishte pasur asnjë komunikim mes palëve.
“Jo, në asnjë moment nuk kanë ardhur, as për falje, asgjë. Po edhe sikur të vinin, unë nuk do t’i falja. Fëmijët nuk kthehen më. Kërkoj që gjyqtari ta mendojë mirë këtë çështje për dy fëmijë që kanë humbur jetën dhe të marrë vendimin e duhur për atë person, që ai të marrë dënimin e merituar. Të shkatërruar jemi familjarisht. Nuk është më njësoj shtëpia pa djalin. Ndihemi të shkatërruar.
Çdo gjë është si në erë, siç i thonë. Në çdo cep nuk gjejmë më asgjë. Atë dikush po e ndihmon. Se kush? Nuk e di. Nuk kemi shtet. Shteti duhet ta kishte parandaluar këtë person, pasi disa herë është paralajmëruar nga familjarët dhe nga të gjithë, por nuk u bë asgjë.
Bashkëshorti im e kishte paralajmëruar disa herë që të mos ecte me shpejtësi, sepse në këtë lagje ka shumë fëmijë dhe të moshuar. Fëmijët luajnë çdo ditë, çdo orë, çdo minutë dhe çdo sekondë. Ai kalonte me një shpejtësi marramendëse dhe me muzikë aq të lartë sa nuk tolerohej”, u shpreh nëna e të miturit.
Familja kërkon që procesi gjyqësor të marrë në konsideratë pasojat e rënda të aksidentit dhe që drejtësia të japë një vendim të merituar për humbjen e dy jetëve të mitura.














