Bizneset shqiptare që merren me importin dhe eksportin e mallrave pritet të përfitojnë procedura më të thjeshta administrative. Qeveria ka miratuar projektligjin për krijimin e Dritares së Vetme Kombëtare për Doganat, një sistem elektronik që synon të bashkojë në një platformë të vetme procedurat dhe dokumentacionin e nevojshëm për tregtinë ndërkombëtare.
Këshilli i Ministrave miratoi projektligjin më 20 nëntor, ndërsa dokumenti pritet t’i përcillet Kuvendit për shqyrtim dhe miratim.
Aktualisht, kompanitë që importojnë apo eksportojnë produkte duhet të komunikojnë me disa institucione të ndryshme për të siguruar dokumentet, lejet dhe autorizimet përkatëse. Me funksionimin e sistemit të ri, këto procedura synohet të përqendrohen në një platformë të vetme elektronike, ku bizneset do të dorëzojnë të dhënat vetëm një herë dhe institucionet do t’i shkëmbejnë ato në mënyrë digjitale.
Një shembull konkret janë kompanitë që importojnë produkte ushqimore, të cilat krahas dokumentacionit doganor duhet të kryejnë edhe verifikime pranë autoriteteve të sigurisë ushqimore. Përmes platformës së re, informacioni i nevojshëm do të përcillet elektronikisht ndërmjet institucioneve, duke shmangur dorëzimin e përsëritur të të njëjtave dokumente.
Projektligji parashikon gjithashtu kontrollin automatik të dokumentacionit dhe forcimin e bashkëpunimit mes administratës doganore, institucioneve shtetërore dhe operatorëve ekonomikë.
Një tjetër objektiv i kësaj nisme është përafrimi me standardet e Bashkimit Evropian. Për këtë arsye, sistemi shqiptar është parashikuar të lidhet me mekanizmin elektronik evropian EU CSW-CERTEX, i cili mundëson shkëmbimin e certifikatave dhe dokumenteve doganore.
Sipas projektligjit, ndërlidhja me këtë mekanizëm të Bashkimit Evropian do të realizohet në momentin e anëtarësimit të Shqipërisë në BE.

