Sali Berisha ka deklaruar se Erion Veliaj dhe Elisa Spiropali dinë më shumë se të tjerët për korrupsionin e kryeministrit Edi Rama dhe të ish-zëvendëskryeministres Belinda Balluku. Në një prononcim për mediat, Berisha u pyet nga gazetari Gjon Lajthia për ftesën që u ka bërë Veliajt dhe Spiropalit për t’iu bashkuar kundër qeverisjes socialiste, pavarësisht akuzave për korrupsion ndaj të dyve.
Berisha pranoi se Veliaj dhe Spiropali janë të korruptuar, por argumentoi se ata mund të kontribuojnë në largimin e qeverisë, pasi, sipas tij, kanë dijeni për shumë më tepër se të tjerët lidhur me korrupsionin e Ramës dhe Ballukut.
Ai u bëri thirrje që të përpiqen të bindin edhe deputetë të tjerë për t’u bashkuar në këtë betejë.
Prononcimi i plotë:
Gjon Lajthia: Ju ftoni Erion Veliajn dhe Elisa Spiropalin të na bashkohen kundër qeverisjes socialiste, por a ka më të korruptuar sesa këta të dy që ju po ftoni?
Sali Berisha: I dashur Gjon, këta të dy janë të korruptuar, pa asnjë diskutim.
Por ju as nuk mund ta merrni dot me mend miliardat e eurove të korrupsionit të Edi Ramës.
Ju as nuk mund ta merrni dot me mend ndikimin e tmerrshëm të sallave plot me narko-euro kundër shqiptarëve, të cilat i ka të gjithë Edi Rama në kontroll.
Ndaj dhe të ftoj që të ftojmë së bashku secilin që mund të kontribuojë në largimin e kësaj dysheje nga pushteti që po rrënon qenien shqiptare.
Çfarë ka në dorë Erion Veliaj dhe Elisa Spiropali?
Ata dinë shumë më tepër se të tjerët për korrupsionin e Edi Ramës dhe Lubi Ballukut.
Ata duhet të përpiqen të bëjnë sa më shumë njerëz me vete nga ata deputetë.
Është sot betejë për jetë, betejë për ekzistencën e kombit.
Ne po shkojmë duke e zbrazur Shqipërinë.a.b





