Sot në Asamblenë e Partisë Socialiste të Tiranës, Drejtuesja Politike, Ogerta Manastirliu prezantoi organizimin e ri politik të PS-së në kryeqytet.
Manastirliu tha se Tirana mbetet baza më e fortë e Partisë Socialiste dhe e cilësoi garën për Tiranën si një sprovë të madhe, duke kërkuar më shumë mobilizim të strukturave dhe komunikim të përditshëm me qytetarët.
“Jemi përballë një sprove të madhe dhe unë, modestisht, me aq eksperiencë sa kam në strukturat e PS-së, nuk besoj se mund të kemi pasur një sprovë kaq të madhe në këtë terren kaq të vështirë sa kjo e sotmja për të fituar një garë e cila nuk kërkohet vetëm për PS-në, por kërkohet për Shqipërinë, fëmijët, të rinjtë dhe të rejat. Sepse ata duan ta bëjnë jetën këtu dhe ne duhet t’ua bëjmë të mundur. Aty ku sfida është më e madhe, mundësitë janë më të mëdha, ndaj na duhet më shumë punë. Dhe le ta themi hapur: do të na duhet dhjetë herë më shumë punë, mobilizim, disiplinë dhe energji”, tha Manastirliu.
Në Asamblenë e Partisë Socialiste të Tiranës, Manastirliu prezantoi dhe pesë nivelet e përgjegjësisë në organizimin e ri politik.
“Do të ketë 5 nivele. 19 deputetë, ministra të ndarë në 27 njësitë vendore të Tiranës. 34 blloqe do të mbeten si formë organizimi për prezencën e Pranisë Besnike, mbi 30 koordinatorë zonalë, 420 të deleguar dhe e gjithë forca e PS-së së Tiranës. Kjo është skuadra jonë. Nga sot ne nisim këtë fushatë me 3 drejtime: deri në dhjetor konsolidojmë strukturat, deri në mars punë në terren dhe më pas fushata zgjedhore e fitores historike”, tha Manastirliu.

