Një sondazh i kryer së fundmi në Mbretërinë e Bashkuar tregon një ndryshim të ndjeshëm të qëndrimit të opinionit publik ndaj Brexit-it, me katër në pesë zona elektorale që mbështesin tashmë rikthimin në Bashkimin Evropian. Sipas anketimit, të cituar nga The Guardian, nga 632 zona elektorale të marra në analizë, 512 favorizojnë rikthimin në BE, 73 preferojnë që vendi të qëndrojë jashtë unionit, ndërsa 47 të tjera janë të pavendosura. Ndryshimi është veçanërisht i dukshëm edhe në zonat që në referendumin e vitit 2016 votuan për largimin nga BE-ja. Nga 394 zona të tilla, 274 mbështesin tashmë rikthimin. Të dhënat tregojnë gjithashtu rritje të mbështetjes për rikthimin në union edhe në zona të përfaqësuara nga ministra të kabinetit qeveritar. Ndërkohë, kryeministri britanik ka deklaruar se synon të krijojë marrëdhëniet sa më të ngushta të mundshme me Bashkimin Evropian. Kjo qasje vjen pas një marrëveshjeje të re të arritur në Bruksel për lëvizjen e të rinjve dhe eksportet ushqimore.