Kryeministri i Maqedonisë së Veriut, Hristijan Mickoski, ka shmangur kërkesën për falje ndaj shqiptarëve pas incidentit në Pustec, ku u raportua për mosrespektimin e himnit shqiptar. I pyetur gjatë konferencës së përbashkët me kryeministrin Edi Rama në Qafë Thanë, Mickoski pretendoi se himni ishte ekzekutuar dhe se aktiviteti duhej ndjekur deri në përfundim.
“Ne jemi popull shumëetnik dhe i vlerësojmë të gjithë. Sot po festojmë 22 Nëntorin. Në lidhje me himnin, nuk e keni ndjekur aktivitetin deri në fund. Himni u zbatua. Të relaksohemi”, tha Mickoski.
Gjatë konferencës u shënua edhe një moment tensioni, pasi një gazetar nga Tetova akuzoi kryeministrin Edi Rama se nuk kishte folur për shqiptarët e Maqedonisë së Veriut.
Rama iu përgjigj duke theksuar se Maqedonia e Veriut është shtet sovran dhe se shqiptarët atje kanë partitë e tyre politike për t’u përfaqësuar.
“Ju as më keni parë e as do të më shikoni të bëj fushatë për ndonjë parti politike në Maqedoninë e Veriut”, tha Rama.
Kryeministri shqiptar shtoi se nuk duhet kapërcyer kufiri i ndërhyrjes në çështjet e brendshme të një shteti tjetër.a.b





