Kryeministri Edi Rama ka marrë me vete në Manastir stresin që i kanë dhënë protestat në protestat e studentëve në Tiranë dhe refuzimin e studentëve për të zhvilluar dialog me qeverinë. Rama foli gjatë një takimi me të rinj shqiptarë në Manastir, me rastin e Ditës së Alfabetit ndërsa tha se duartrokitjet e të rinjve janë bërë më të rralla për të, pasi, sipas tij, ata që duan të shprehin mbështetje kanë frikë nga ata që gjuajnë me gurë, ndërsa ata që duan të flasin tremben nga ata që nuk pranojnë të flasin.
“Gjithmonë ka të rinj që duartrokasin dhe të rinj që nuk duartrokasin, të rinj që entuziazmohen dhe të rinj që hidhërohen. Por sot është një kohë pak e veçantë, sepse ata që duan të duartrokasin tremben nga ata që gjuajnë me gurë. Ata që duan të flasin tremben nga ata që nuk duan të flasin. Dhe për shkak të kësaj specifike të një kohe që është shumë kalimtare, sigurisht, trokitjet janë më të mirëpritura se zakonisht”, deklaroi Rama.
Kryeministri ndodhej në Manastir, ku mori pjesë në një takim me të rinj nga Shqipëria, Kosova, Maqedonia e Veriut, Mali i Zi dhe Presheva, si dhe me rektorë e përfaqësues të universiteteve. Takimi u zhvillua në Europe House, në kuadër të aktiviteteve për Ditën e Alfabetit.
Gjatë diskutimit për arsimin, identitetin kulturor dhe bashkëpunimin mes të rinjve, Rama propozoi krijimin e një biblioteke digjitale mbarëkombëtare, ku të përmblidhet pasuria gjuhësore dhe letrare shqipe dhe që të jetë e aksesueshme për shqiptarët kudo që jetojnë.m.k




