I 'forti' i Fushë-Kuqes që rrahu Eduart Kuçin, kapet nga policia brenda në tualet

Elton Qyno - Syri.net

Arrestohet këngëtari Jozefin Marku pas dhunës ndaj Eduart Kuçit, fshihej në tualetin e banesës së një 31-vjeçari

Policia e Tiranës ka arrestuar këngëtarin Jozefin Marku, pas publikimit të një videoje që u bë virale në TikTok, ku ai shfaqet së bashku me ish-banorin e “Big Brother VIP Kosova”, Eduart Kuçin, dhe një grup të rinjsh.

Sipas policisë, pas përballjes mes tyre, Marku ka ushtruar dhunë ndaj Kuçit. Ngjarja dyshohet se ka nisur pas një fyerjeje që Kuçi i kishte bërë Markut, ndërsa më pas konflikti verbal ka përshkallëzuar në dhunë fizike.

Gjatë momentit të arrestimit, 30-vjeçari Jozefin Marku po qëndronte i fshehur në tualetin e banesës së Kristjan Nikollit, 31 vjeç, i cili u arrestua gjithashtu.

Gjatë kontrollit të banesës së Nikollit, policia sekuestroi një sasi municioni. Gjithashtu, u sekuestrua edhe një automjet tip “Land Rover”, që dyshohet se është përdorur gjatë ngjarjes.

Ndërkohë, autoritetet po vijojnë veprimet hetimore për të dokumentuar plotësisht rrethanat e konfliktit dhe për të sqaruar rolin e personave të përfshirë.

Policia po punon gjithashtu për kapjen e dy personave të tjerë, të cilët dyshohet se kanë bashkëpunuar me Markun dhe aktualisht janë shpallur në kërkim.

Pamjet e publikuara në rrjetet sociale janë bërë pjesë e hetimit, ndërsa materialet procedurale do t’i nënshtrohen vijimit të procedurave ligjore nga organet kompetente.