Sekretari për të Drejtat e Njeriut në PD, Franc Nuri ka reaguar lidhur me bllokimin e pagave të gjyqtarëve, prokurorëve, OPGJ-ve dhe administratës gjyqësore, duke akuzuar qeverinë se po kërkon të fitojë kohë dhe po e zhvendos përgjegjësinë te Kuvendi.
Përmes një reagimi në rrjete sociale, Nuri shkruan se kjo nuk është më një çështje pagash, por sipas tij lidhet drejtpërdrejt me shtetin e së drejtës dhe Reformën në Drejtësi.
Sipas tij, situata duhet të ngrejë alarm jo vetëm në Shqipëri, por edhe në Bruksel, duke kërkuar që institucionet e Bashkimit Europian dhe partnerët ndërkombëtarë të informohen për zhvillimet.
“Shqipëria kërkon anëtarësimin në Bashkimin Europian. Pikërisht Grupkapitulli i I-rë i negociatave, “Themeloret”, vendos në zemër të procesit funksionimin e shtetit të së drejtës, pavarësinë e drejtësisë dhe respektimin e vendimeve gjyqësore nga vetë institucionet shtetërore.
Sot kemi një vendim të Gjykatës Kushtetuese dhe një shtet që, në vend që ta zbatojë, po kërkon kohë dhe një rrugë tjetër politike. Kjo duhet të ngrejë alarm këtu por edhe në Bruksel.
Duhet të informohen institucionet e Bashkimit Europian, përfaqësitë diplomatike, Shtetet e Bashkuara të Amerikës dhe të gjithë partnerët e donatorët që kanë investuar politikisht dhe financiarisht në Reformën në Drejtësi”,- shprehet Nuri ndër të tjera.
