Një zjarr i përmasave të mëdha ka përfshirë zonën e By-Pass-it të Himarës pasditen e kësaj të premteje, duke u përhapur me shpejtësi drejt zonave të banuara. Era e fortë ka favorizuar përparimin e flakëve, ndërsa situata është rënduar gjatë orëve të mbrëmjes.
Fillimisht zjarri përfshiu sipërfaqe të mëdha toke në zonën e kodrave, ndërsa më pas flakët iu afruan banesave. Deri tani raportohet se dy banesa janë shkrumbuar, ndërsa rreth 40 të tjera ndodhen në rrezik për shkak të afërsisë me vatrën e zjarrit.
Për shkak të përhapjes së flakëve, ka nisur evakuimi i banorëve nga zonat e rrezikuara. Paralelisht, janë larguar edhe turistë të akomoduar në hotelet pranë zonës së përfshirë nga zjarri, pasi flakët janë afruar ndjeshëm me strukturat turistike.
Situata është bërë edhe më kritike. Pamjet nga terreni tregojnë flakë me intensitet të lartë, ndërsa fronti i zjarrit është shtrirë në kodrat përreth qytetit dhe në disa pika është afruar pranë banesave.
Një qytetar ka kërkuar ndërhyrje nga ajri, duke deklaruar se banorët po largohen me shpejtësi nga Himara dhe se disa banesa janë rrethuar nga flakët.
“Kërkojmë ndërhyrje urgjentisht nga ajri sepse shikojmë disa shtëpi të rrethuara nga zjarri. Nuk po na japin sqarim nëse ka pasur njerëz brenda apo është djegur dikush. Zjarri po i afrohet qytetit. Ju lutem kërkojmë ndihmë se nuk kemi mundësi”, shprehet ai.
Klikoni videon
Ndërkohë, në një reagim për situatën, kryebashkiaku i Himarës, Vangjel Tavo, ka pranuar dështimin për shuarjen e flakëve ndërsa u ka bërë thirrje banorëve të largohen nga banesat, bizneset apo ambientet e tjera që ndodhen në rrezik.
Në postimin e tij, Tavo ka vënë në dispozicion edhe disa numra kontakti të emergjencave, për banorët në terren, edhe pse deri më tani emergjencat nuk kanë mundur të neutralizojnë situatën.
“Për shkak të zjarrit të papritur që po përparon drejt zonave të banura, ju bëjmë thirrje të largoheni nga shtëpitë, bizneset apo abiente të tjera që mund të përbëjnë rrezik për jetën. Ju lutemi, kërkoni ndihmën e organeve të policisë se rendit, policisë bashkiak, zjarrfikësve dhe urgjencës mjeksore në çdo kohë. Ruani qetësinë dhe zbatoni udhëzimet e autoriteteve”,- thuhet në postim.
Deri në këto momente, dy banesa janë raportuar të djegura, ndërsa rreziku mbetet i lartë për banesat e tjera dhe strukturat turistike pranë zonës së zjarrit.
