Publikuar më 05.09.2026 nga Shek

Prokuroria e Romës ka nisur një hetim për të verifikuar nëse rrjeti i Jeffrey Epstein ka pasur lidhje me persona apo aktivitete kriminale në Itali.

Në fokus të hetimit janë dokumentet e bëra publike në kuadër të të ashtuquajturave “Dosja Epstein”, ndërsa autoritetet italiane u kanë kërkuar homologëve amerikanë edhe materiale që nuk janë bërë ende publike.

Sipas raportimeve të “La Repubblica”, hetimi po drejtohet nga zëvendësprokurori i Romës, Maurizio Arcuri, i cili i ka dërguar Departamentit amerikan të Drejtësisë një kërkesë zyrtare për dokumentacionin që lidhet me krimet e dyshuara të Epstein dhe bashkëpunëtorëve të tij.

Hetuesit po verifikojnë dyshimet për sulme seksuale, trafikim dhe shfrytëzim seksual të grave dhe të miturve, si dhe nëse persona të lidhur me Epstein mund të kenë qenë të përfshirë në veprimtari kriminale në Itali apo jashtë saj.

Hetimi dyshohet se është nxitur nga një kallëzim i depozituar më 26 mars nga shoqata “Differenza Donna”, e cila i kërkoi Prokurorisë së Romës të hetojë për krime të mundshme transnacionale të dhunës, trafikimit dhe shfrytëzimit seksual.

Në dokumentet amerikane të bëra publike ka referenca për “incidente të përsëritura që përfshinin individë italianë”, si dhe të dhëna për udhëtime dhe qëndrime të lidhura me Italinë.

Megjithatë, përmendja e një personi në dokumentet e Epstein nuk përbën në vetvete provë se ai person ka kryer një krim. Pikërisht lidhjet mes këtyre kontakteve dhe aktiviteteve kriminale të dyshuara janë ato që autoritetet italiane synojnë të sqarojnë.

Dokumentet përmbajnë referenca të shumta për Italinë, ndërsa emri i Epstein lidhet me udhëtime dhe kontakte në disa prej zonave më të njohura të vendit.

Hetuesit po përpiqen të përcaktojnë nëse këto marrëdhënie kanë qenë thjesht sociale apo biznesi, apo nëse mund të kenë pasur lidhje me aktivitetet kriminale për të cilat Epstein ishte akuzuar në SHBA.

Epstein u arrestua në vitin 2019 në SHBA, nën akuzat për trafikim seksual të të miturve. Ai u gjet i vdekur në qelinë e tij në Manhattan në gusht të po atij viti. Vdekja e tij u klasifikua zyrtarisht si vetëvrasje.

Italia është një prej vendeve evropiane ku autoritetet po shqyrtojnë lidhjet e mundshme me rrjetin e Epstein. Verifikime apo hetime të ngjashme janë raportuar edhe në Francë, Norvegji, Poloni dhe Mbretërinë e Bashkuar.

Rasti ka prekur edhe figura publike në Britani, ndërsa autoritetet kanë shqyrtuar marrëdhëniet e tyre me financierin amerikan.

Mes emrave italianë të përmendur në dokumentet dhe diskutimet e fundit është edhe Lapo Elkann, i cili ka mohuar çdo përfshirje në veprimtari të paligjshme.

Elkann ka deklaruar se është takuar me Epstein në dy raste. Takimi i parë, sipas tij, ka ndodhur në Nju Jork, kur ai ishte asistent i Henry Kissinger, në një aktivitet publik ku merrnin pjesë figura nga politika dhe financat.

Takimi i dytë, sipas deklaratës së Elkann, ka ndodhur në Romë, gjatë një aktiviteti biznesi të lidhur me Brasilinvest.

Ai ka mohuar të ketë pasur korrespondencë të drejtpërdrejtë me Epstein dhe ka theksuar se përmendja e emrit të tij, pa prova që e lidhin me aktivitetet kriminale të financierit amerikan, nuk përbën bazë për të nxjerrë përfundime mbi përfshirjen e tij.

Elkann ka deklaruar gjithashtu se është veçanërisht i ndjeshëm ndaj çështjeve të abuzimit dhe dhunës dhe se, përmes Fondacionit LAPS, ka mbështetur prej vitesh iniciativa në ndihmë të grave dhe fëmijëve viktima të dhunës.