Trupi i Ratko Mlladiçit mbërriti në aeroportin e Beogradit me një avion të qeverisë serbe të enjten, pas vdekjes së tij javën e kaluar, ndërsa po vuante një dënim me burgim të përjetshëm për gjenocid dhe krime të tjera të kryera gjatë luftës.
Avioni që transportonte trupin e ish-komandantit ushtarak të serbëve të Bosnjës u prit në aeroportin e Beogradit nga ministri serb i Drejtësisë, Nenad Vujiç, djali i Mlladiçit, Darko Mlladiç, një autokolonë automjetesh policie dhe një gardë nderi e ushtrisë. Arkivoli ishte mbuluar me flamurin serb.
Më pas, trupi u transportua me një autokolonë, të prirë nga dy motoçikleta të policisë, nga aeroporti drejt Akademisë Mjekësore Ushtarake, një spital në Beograd, ku do të kryhet autopsia.
“Me kërkesë të familjes së gjeneralit Ratko Mlladiç dhe bazuar në një letër të ministrit të Drejtësisë, Akademia Mjekësore Ushtarake do të kryejë autopsinë e mbetjeve mortore të gjeneralit Ratko Mlladiç”, tha Ivan Lekoviç, zëvendësdrejtor i Akademisë Mjekësore Ushtarake.
“Të gjitha gjetjet, si nga autopsia, ashtu edhe nga të gjitha analizat dhe testet, do t’i dorëzohen familjes dhe institucioneve përkatëse sa më shpejt të jetë e mundur”, tha ai.
Përparimi i autokolonës drejt kryeqytetit u transmetua drejtpërdrejt nga televizioni proqeveritar Informer TV. Përgjatë autostradës, pamjet e Informer treguan grupe mbështetësish të mbledhur mbi mbikalime, me pankarta që glorifikonin Mlladiçin dhe mesazhe të tilla si “Faleminderit, gjeneral” dhe “Mirë se erdhe në shtëpi, gjeneral”.
Presidenti serb Aleksandër Vuçiç tha më herët të enjten se shteti do të ishte i gatshëm të ofronte “çdo lloj mbështetjeje logjistike, transporti dhe mbështetje tjetër, si dhe të ndihmonte në ruajtjen e rendit publik, paqes dhe sigurisë” gjatë transferimit të trupit të Mlladiçit dhe funeralit të tij.
“Ne do të jemi aty për të ofruar çdo lloj mbështetjeje logjistike, transporti dhe mbështetjeje për ruajtjen e rendit publik, paqes dhe sigurisë”, tha Vuçiç.
Vuçiç shtoi se “vlerësimet e Agjencisë së Informacionit të Sigurisë, Agjencisë së Inteligjencës Ushtarake dhe Ministrisë së Punëve të Brendshme” sugjerojnë se në funeral mund të marrin pjesë “dhjetëra mijëra njerëz”.
Vendi ku do të zhvillohet funerali ende nuk është bërë i ditur.
Mlladiçi vdiq më 27 gusht në Njësinë e Paraburgimit të OKB-së në Holandë, në moshën 84-vjeçare, ndërsa po vuante një dënim me burgim të përjetshëm për kryerjen e gjenocidit, krimeve kundër njerëzimit dhe krimeve të luftës gjatë luftës së viteve 1992–1995 në Bosnjë dhe Hercegovinë.
Mekanizmi Ndërkombëtar Rezidual për Gjykatat Penale, pasuesi i Tribunalit të Hagës, tha të enjten se dorëzimi i trupit të Mlladiçit u krye në aeroportin Roterdam.
“Mekanizmi ka vepruar me respekt të plotë për të drejtën ndërkombëtare dhe normat e të drejtave të njeriut dhe ka bashkëpunuar ngushtë me familjarët e z. Mlladiç dhe përfaqësuesit diplomatikë, aty ku ka qenë e përshtatshme, për të lehtësuar të gjitha kërkesat administrative, logjistike dhe ligjore të nevojshme për transferimin e respektueshëm dhe dinjitoz të trupit të pajetë për riatdhesim”, tha IRMCT në një deklaratë.
Serbia është një vend kandidat për anëtarësim në BE dhe komisionerja e bllokut për zgjerimin, Marta Kos, paralajmëroi të hënën se glorifikimi i kriminelëve të luftës është “në kundërshtim me vlerat themelore evropiane dhe nuk ka vend në Bashkimin Evropian apo në vendet që aspirojnë të bëhen anëtare”, raportoi AFP.
