një orë më parëMerr hov tregu i kriptomonedhave, Bitcoin kalon 70 mijë dollarëshin
Periskopi(15 ditë më parë)
(15 ditë më parë)Bitcoin shënoi një rritje të fortë të enjten, duke u ngjitur me 22,9% ne 7 ditet e fundit dhe kaluar nivelin e 70 mijë dollarëve për herë të parë në më shumë se dy muaj. Rritja u mbështet nga rënia e rendimenteve të obligacioneve të Thesarit amerikan dhe nga optimizmi i rikthyer për zhvillimet rregullatore në tregun e kriptomonedhave në Shtetet e Bashkuara.
Kriptomonedha më e madhe në botë arriti në rreth 71.700 dollarë, niveli më i lartë që prej 1 qershorit, duke vijuar tendencën pozitive të nisur një ditë më parë.
Kapitalizimi i tregut të Bitcoin u rrit me rreth 11,1% gjatë 24 orëve, duke arritur në 1,43 trilion dollarë. Ndërkohë, vëllimi ditor i tregtimit u rrit me mbi 260%, në rreth 60,8 miliardë dollarë.
Rritja përfshiu edhe pjesën tjetër të tregut të kriptomonedhave. Kapitalizimi i përgjithshëm i sektorit u zgjerua me 10,23%, në 2,42 trilion dollarë. Ethereum, kriptomonedha e dytë më e madhe për nga vlera e tregut, regjistroi një rritje edhe më të fortë, prej 18,6%, duke arritur në rreth 2.270 dollarë.
Bitcoin kishte shënuar që të mërkurën rritjen më të madhe ditore që prej muajit mars, në prag të takimit të presidentit amerikan Donald Trump me drejtues të disa prej kompanive më të mëdha të industrisë së kriptomonedhave, mes tyre Coinbase, Payward – operatori i platformës Kraken – dhe Blockchain.com.
Takimi shtoi pritshmëritë për përparim të mëtejshëm lidhur me të ashtuquajturin “Clarity Act”, një projektligj që synon të përcaktojë më qartë strukturën e tregut dhe kuadrin rregullator për asetet digjitale në Shtetet e Bashkuara.
Projektligji nuk arriti të kalonte në votim në Senat përpara nisjes së pushimeve të gushtit, por investitorët mbeten optimistë se diskutimet mund të rifillojnë me rikthimin e ligjvënësve.
