Roma e ka prioritet për janar, Endrick po e mendon seriozisht largimin nga Real Madridi

Futboll

Gazeta Express

05/09/2026 16:57

Roma ka nisur të mendojë seriozisht për merkaton e janarit dhe në krye të listës së dëshirave të klubit italian është një emër i madh: Endrick.

Sulmuesi brazilian i Real Madridit është shndërruar në një objektiv konkret të verdhekuqve, ndërsa sipas raportimeve të fundit nga Italia, 20-vjeçari po e konsideron gjithnjë e më seriozisht një transferim në kryeqytetin italian.

Interesimi i Romës për Endrickun nuk është i ri. Klubi italian kishte tentuar të lëvizte për brazilianin edhe gjatë afatit kalimtar të verës, por në atë kohë kushtet nuk u krijuan për realizimin e marrëveshjes. Tash, megjithatë, pista është rikthyer fuqishëm dhe Roma pritet ta provojë sërish në janar.

Madje, sipas Corriere dello Sport, Endrick u ka thënë miqve të tij se një kalim te Roma është një mundësi shumë reale. Sulmuesi fillimisht pranoi të qëndronte në Madrid për të luftuar për hapësira në ekipin e José Mourinhos, por ideja e një largimi në Itali në merkaton e dimrit tashmë po merr formë.

Roma po shqyrton mundësinë e një huazimi, formulë që mund ta bëjë marrëveshjen më të realizueshme për të dyja klubet. Verdhekuqtë kërkojnë të shtojnë alternativat në repartin ofensiv dhe Endrick shihet si një profil që mund t’i përshtatet projektit të Gian Piero Gasperinit.

Në listën e Romës për janar është edhe Luiz Henrique, i cili mbetet një tjetër objektiv për krahun e sulmit. Drejtori sportiv Tony D’Amico dhe Gasperini pritet të punojnë së bashku për përforcimin e skuadrës në pjesën e dytë të sezonit.

Megjithatë, një transferim i Endrickut në Romë nuk është ende i mbyllur. Gjithçka do të varet nga hapësirat që braziliani do të ketë te Real Madridi gjatë muajve të ardhshëm dhe nga qëndrimi i klubit spanjoll për një huazim.