Ekonomia e Shteteve të Bashkuara ka shtuar 162 mijë vende pune në muajin gusht. Të dhënat rezultuan dukshëm mbi pritshmëritë e analistëve.
Ekonomistët e anketuar nga Reuters kishin parashikuar një rritje prej 56 mijë vendesh pune, Wall Street Journal 53 mijë, ndërsa Bloomberg 55 mijë.
Arsimi në nivelin e qeverisjes vendore, që përfshin kryesisht shkollat publike, përbënte rreth 42 mijë nga vendet e reja të punës, teksa në pjesën më të madhe të SHBA-së nis viti shkollor 2026–2027. Mësuesit zakonisht largohen përkohësisht nga listat e punësimit gjatë muajve të verës, kur shkollat nuk janë në funksion.
Edhe sektori i shërbimeve ushqimore shënoi një rritje të konsiderueshme, duke shtuar 59 mijë vende pune gjatë muajit gusht krahasuar me muajin paraardhës.
Rritje u regjistrua gjithashtu në ndërtim, i cili shtoi 22 mijë vende pune, si dhe në sektorin e shëndetësisë, me 12 mijë vende të reja pune.
Në të kundërt, sektori i informacionit, ku përfshihen industri si përpunimi i të dhënave, hostimi i faqeve në internet, botimet, transmetimet dhe telekomunikacioni, humbi 23 mijë vende pune. Shkurtime të konsiderueshme të vendeve të punës u raportuan në kompani si Scripps TV dhe Zillow, të cilat bëjnë pjesë në këto industri.
Sektori i aktiviteteve financiare, ku përfshihen sigurimet, bankat tregtare dhe pasuritë e paluajtshme, u tkurr me 12 mijë vende pune.
Të dhënat e reja bien në kontrast të fortë me raportin kombëtar të punësimit të ADP-së, i cili ndjek punësimin në sektorin privat dhe kishte evidentuar vetëm 38 mijë vende të reja pune në ekonominë amerikane.
Ndërkohë, raporti i Departamentit të Punës për Vendet e Lira të Punës dhe Qarkullimin e Punonjësve (JOLTS), i publikuar të martën, tregoi se numri i vendeve të lira të punës ndryshoi lehtë, duke arritur në 7.3 milionë në korrik, nga 7.2 milionë një muaj më parë.
Numri i përgjithshëm i largimeve nga puna ra në 5.1 milionë në korrik, nga 5.3 milionë në qershor.
Rritja e punësimit vjen përpara mbledhjes së Rezervës Federale të SHBA-së, e cila do të zhvillohet më vonë gjatë këtij muaji dhe ku banka qendrore do të votojë për normat e interesit.
Në dritën e të dhënave të reja për punësimin, FedWatch i CME Group, i cili ndjek probabilitetin e vendimeve të politikës monetare, vlerësonte me 60% mundësinë e një rritjeje prej 25 pikë bazë të normës së interesit, në intervalin 3.75–4.00%, nga 49% që ishte të enjten.
