Publikuar më 04.09.2026 nga Shek

Kuvendi i Malit të Zi ka miratuar unanimisht propozimin për ndryshimin e Kushtetutës, i cili ndër të tjera parashikon heqjen e imunitetit për presidentin dhe anëtarët e qeverisë në rastet e veprave penale, përfshirë veprat korruptive.

Për propozimin votuan të gjithë 66 deputetët e pranishëm, duke siguruar shumicën prej dy të tretash të nevojshme për nisjen e procedurës së ndryshimit të Kushtetutës, duke qenë një hap më pranë Bashkimit Evropian.

Deputetët miratuan gjithashtu unanimisht propozimin e Komisionit Kushtetues që brenda katër ditësh të përcaktohet teksti i draft-amendamenteve kushtetuese.

Sipas arsyetimit të propozimit, veprat penale kundër detyrës zyrtare, si keqpërdorimi i pozitës zyrtare, marrja dhe dhënia e ryshfetit dhe vepra të tjera të ngjashme, cenojnë drejtpërdrejt integritetin e pushtetit publik, besimin e qytetarëve në institucione dhe parimet themelore të rendit kushtetues.

Nënkryetari i Kuvendit të Malit të Zi dhe deputeti i Forumit Shqiptar, Nikola Camaj, e mbështeti nismën, duke theksuar se funksioni publik nuk duhet të shërbejë si mburojë për keqpërdorime.

“Përgjegjësia duhet të jetë e barabartë për të gjithë, pavarësisht se cilin funksion e ushtrojnë”, tha Camaj, duke shtuar se politika duhet të jetë në shërbim të interesit publik dhe përmirësimit të jetës së qytetarëve.

Lidhur me këto zhvillime në Malin e Zi, reagoi Kryetari i Grupit Parlamentar të Partisë Demokratike, Gazment Bardhi. Bardhi shprehet se ndryshe nga Mali i Zi, në Shqipëri ka ndodhur ekzaktësisht e kundërta.

‘’Kur SPAK kërkoi pezullimin e Belinda Ballukut nga detyra, Edi Rama propozoi një mbrojtje tjetër shtesë nga drejtësia për veten dhe ministrat, ndryshimin e Kodit të Procedurës Penale, në mënyrë që SPAK-u të mos ketë asnjë mundësi të kërkojë dhe gjykata asnjë mundësi të pezullojë nga detyra Kryeministrin, ministrat dhe funksionarë të tjerë të lartë gjatë procedimit penal.

Dhe nuk i mbaroi këtu aktet kundër integrimit europian të vendit. Refuzoi me votë në Parlament heqjen e imunitetit të Belinda Ballukut, duke nxitur vendosjen e kushteve të reja nga Brukseli për anëtarësimin në Bashkimin Europian. Sot, trajtimi i çështjes së imunitetit nga Parlamenti përbën një nga kushtet kyçe për mbylljen e negociatave’’, thotë ai në një reagim.

Sipas Bardhit, dallimi mes Kryeministrit të Europës në Mal të Zi dhe Kryeministrit të Korrupsionit në Shqipëri është si dita me natën. Njëri i jep çdo liri drejtësisë për të hetuar korrupsionin, tjetri i vendos pengesa ligjore.

“Por Shqipëria nuk ka pse të mbahet më peng nga halli personal i Edi Ramës dhe nevoja e tij për t’u mbrojtur nga drejtësia. Shqipëria nuk ka pse të paguajë për hallin personal të Edi Ramës me të ardhmen e saj europiane. Sot, interesi i vendit është të ecë përpara. Dhe për këtë, Edi Rama duhet të largohet”, përfundon Bardhi.