Rr. Ismail Qemali, Pallati 18, Kati 1, 1001, Tiranë, Shqipëri
“Shekulli Group”
Përplasja e ditës së djeshme në hotelin ‘Regina’ në Vlorë mes biznesmenëve Vasil Bedinaj dhe Luan Muça ka sjellë reagimin e ministrit të Punëve të Brendshme, Besfort Lamallari, si dhe Drejtorit të Përgjithshëm të Policisë së Shtetit, Skënder Hitaj.
Nga një aktivitet në Kukës, ministri Lamallari theksoi se, përtej çështjeve operacionale që i takojnë Policisë së Shtetit, e rëndësishme është që çdo ngjarje të ndiqet me reagim të shpejtë, hetim të plotë dhe vënie përpara përgjegjësisë të personave të përfshirë.
“Ajo çfarë është e rëndësishme, pa hyrë në çështje operacionale, që i takojnë Policisë së Shtetit, është reagimi i menjëhershëm, i shpejtë i Policisë së Shtetit. Siç e tha drejtori, edhe tani që po flasim vijojnë veprimet hetimore. Pati menjëherë persona të arrestuar, persona të cilët janë ende në kërkim dhe besoj do të gjenden dhe do të vihen para drejtësisë.
Policia e Shtetit mbetet në dispozicion të ligjit dhe të gjitha udhëzimeve të prokurorit të çështjes për zbardhjen e plotë të ngjarjes dhe, patjetër, për vënien para përgjegjësisë të autorëve të përfshirë në këtë situatë”, u shpreh Lamallari.
Duke iu referuar ngjarjes në Vlorë, Drejtori i Përgjithshëm i Policisë së Shtetit, Skënder Hita, tha se forcat policore u angazhuan menjëherë pas marrjes së njoftimit dhe se hetimi vijon në bashkëpunim me Prokurorinë.
“Ngjarja e Vlorës ishte një ngjarje që, në marrjen e njoftimit në momentin e parë, u angazhuan shumë shpejt forcat policore. U bë i mundur ndalimi dhe kapja në flagrancë e disa prej autorëve, të cilët u vunë menjëherë në masën e arrestit në flagrancë.
Vazhdoi hetimi për orë të tëra dhe, edhe në këto momente që jemi së bashku, vazhdojnë veprimet procedurale, edhe në bashkëpunim me prokurorinë.
Është një ngjarje që vërtet ka marrë vëmendje të madhe, por nga ana e Policisë, edhe në deklaratën e parë që u dha dje nga drejtori vendor, vazhdon verifikimi i pretendimeve të të gjitha palëve për kryerjen e veprimeve”, deklaroi Hita.
E gjithë përplasja mes dy biznesmenëve të njohur Muça dhe Bedinaj ka nisur në orën 11:30 të 3 shtatorit, kur Luan Muça mbërriti me të paktën 7 makina dhe mbi 10 persona të armatosur në ‘Regina Palm’. Edhe 24 orë më pas mbetet një mister arsyeja e vërtetë e përplasjes.
Versioni i konfliktit pronësor dyshohet se mbështetet mbi një investim strategjik të kompanisë Delta Group për një resort gjigand në bregdetin mes Drimadhesit dhe Palasës, për truallin e të cilit dyshohet se të dyja palët pretendojnë se kanë letra të rregullta.
Për t’u bërë pjesë e grupit të "Shekulli"
mjafton të klikoni: Join our FB Group dhe kërkesa do t’ju aprovohet.
KOMUNITETI SHEKULLI ONLINE: https://www.facebook.com/groups/1381242728701899/
.jpg)
