Gjykata e Posaçme e Shkallës së Parë ka vendosur zëvendësimin e masave të sigurimit personal “arrest në shtëpi”, të caktuara ndaj ish-drejtorit të ARRSH-së, Gentian Gjylit dhe ish-administratorit të KESH-it, Erald Elezit, lidhur me çështjen penale për shkelje të barazisë në procedurën e prokurimit për ndërtimin e tunelit të Llogarasë. Ndaj tyre janë caktuar masat “detyrim për t’u paraqitur në policinë gjyqësore” dhe “ndalim i daljes jashtë shtetit”. Zëvendësimi i masës është kryer pas tejkalimit të afateve të qëndrimit në masën e mëparshme.
Për këtë çështje, është nën hetim edhe ish-zv.kryeministrja dhe ish-ministrja e Energjisë dhe Infrastrukturës, Belinda Balluku, e cila po hetohet edhe lidhur me tenderët për lotet e Unazës së Madhe.
Elezi dhe Gjyli janë marrë të pandehur për shkelje të barazisë në tenderë edhe në një çështje tjetër, që ka si objekt gjykimi fakte penale në shtatë procedura prokurimi, të zhvilluara në vitet 2020-2022, në Agjencinë për Efiçencën e Energjisë dhe Autoritetin Rrugor Shqiptar, gjatë kohës kur titullar i autoritetit kontraktor ka qenë i pandehuri Evis Berberi. Erald Elezi ka qenë atëherë drejtor i Planifikimit Strategjik dhe Operacioneve në ARRSH, ndërsa Gentian Gjyli ka qenë drejtor i atij institucioni, ashtu si edhe Berberi. Lidhur me këtë çështje, Dritan Prençi ka kërkuar deklarimin fajtor të Elezit dhe Gjylit për shkelje të barazisë në tenderë dhe dënimin e tyre me nga një vit burg.
