Gjykata e Apelit e Juridiksionit të Përgjithshëm Tiranë, vendosi të premten më 21 gusht të miratojë vendimin e Shkallës së Parë për caktimin e masës së sigurimit personal “arrest në burg” ndaj aktivistes politike 32-vjeçare, Julide Yazici. Ajo u arrestua më 4 gusht 2026 në Rinas, ndërsa udhëtonte nga Franca për në Shqipëri, pasi rezultoi se ishte në kërkim nga Interpol Ankaraja për qëllime ekstradimi. Vendimi në Apel u mor nga gjyqtarja Valdete Hoxha ndërsa prokuroria u përfaqësua nga prokurorja Afërdita Ndoi.
Yazici dhe mbrojtësi i saj e ankimuan vendimin e Shkallës së Parë dhe kërkuan “arrest në shtëpi”, me argumentin se e reja nuk paraqet asnjë rrezikshmëri, si dhe se ka statusin e azilantes politike në Francë, vend i Bashkimit Evropian. Po ashtu, u soll në vëmendje se për mundësimin e zbatimit të kësaj mase është marrë dhe shtëpi me qira.
Të pranishëm në seancën e të premtes, ishin në cilësinë e vëzhguesit, përfaqësues të ambasadës franceze në Tiranë.
Kërkesa e përfaqësuesit ligjor të Yazici, avokatit Artan Shllaku, nuk u pranua nga gjykata me arsyetimin se për momentin e ndaluara duhet të mbahet në burg, pasi mund të largohet për në Francë. Sipas gjykatës, rrethanat e paraqitura nga mbrojtja e të ndaluarës, duhet të parashtrohen dhe analizohen në gjykimin tjetër me objekt kërkesën e autoriteteve turke për ekstradimin e aktivistes.
Funksionarë të një përfaqësie diplomatike perëndimore, që kërkuan të mos përmendej vendi nga vinin, i thanë BIRN pas përfundimit të seancës, se është detyrë e autoriteteve shqiptare që të respektojnë ligjet dhe konventat ndërkombëtare, duke qenë se shteti shqiptar është nënshkrues i këtyre konventave.
Avokati Shllaku ka pohuar më parë për BIRN se Yazici kishte qenë edhe një vit më parë në Shqipëri për të takuar familjen dhe nuk kishte pasur probleme. Sipas tij, ajo është nëpunëse publike në Francë dhe jep mësim në një shkollë fillore.
Julide Yazici kërkohet nga autoritetet turke për të vuajtur një dënim të mbetur prej 3 vjetësh, 5 muajsh e 22 ditësh, nga dënimi me 4 vjet burgim në total, nën dyshimet për dhënie të ndihmës logjistike dhe pjesëmarrje në organizatë terroriste.
Sipas vendimit të Gjykatës Kombëtare të Azilit, CNDA, në Francë, të datës 16 nëntor 2020, të cilin BIRN e ka, Yazici është përfshirë vazhdimisht në aktivizëm politik në Turqi dhe ka qenë pjesëmarrëse në protestat e famshme të Parkut Gezi në vitin 2013 kundër qeverisjes së presidentit aktual të Turqisë, Rexhep Tajip Erdogan. Ajo ka mbështetur aktivisht ish-Partinë Demokratike të Popullit, HDP, një forcë politike e majtë që mbështeste minoritetin kurd në Turqi dhe që u transformua më vonë në “DEM Parti”.
Vendimi i gjykatës franceze që i ka njohur azilin Yazicit, thotë se ajo u arrestua në janar 2016 “për shkak se i kishte lejuar një gruaje të re që nuk e njihte, e cila i ishte prezantuar nga një mik, të qëndronte në dhomën e saj studentore”. Duke justifikuar njohjen e statusit të azilantes, gjykata franceze citon në dokument se “znj. Yazici ka një frikë të justifikuar, në kuptim të dispozitave të përmendura më lart të Konventës së Gjenevës, se do të përndiqet nëse kthehet në vendin e saj për shkak të aktivizmit të saj politik,” dhe në Nenin 2 të po këtij vendimi sanksionohet: “Znj. Julide Yazici njihet si refugjate.”
Në lidhje me këtë çështje ka reaguar organizata e majtë franceze “Union pour la Reconstruction Communiste”, URC, e cila deklaroi se Yazici është anëtare e saj. Organizata theksoi në një publikim në X se “nëse Julide do të ekstradohej, ajo rrezikon të pësojë tortura dhe trajtime çnjerëzore”.
Arrestimi i Yazicit vjen në një moment interesant, pasi forcat politike në Turqi, përfshirë partinë e Erdoganit dhe përfaqësuesit e kurdëve në parlament, arritën një marrëveshje që synon ndër të tjera edhe një amnisti për shumë prej kurdëve të dënuar.
Yazici nuk është e para shtetase turke dhe aktiviste politike që arrestohet për qëllime ekstradimi në Shqipëri. Më herët, mësues dhe punonjës të lidhur me lëvizjen e të ndjerit Fetullah Gylen janë arrestuar për qëllime ekstradimi. Shqipëria ka dorëzuar në mënyrë kontroverse qytetarë turq të dyshuar si të lidhur me lëvizjen gyleniste.
