Kryetari i Partisë Demokratike, Sali Berisha, është nisur sot drejt Shteteve të Bashkuara të Amerikës, ku pritet të marrë pjesë në Konventën e Partisë Republikane.
Para udhëtimit, në një prononcim për mediat në aeroport, Berisha e cilësoi vizitën si një moment me rëndësi të veçantë për Shqipërinë, duke e lidhur atë me udhëtimin e tij të parë në SHBA në mars të vitit 1991.
Ai deklaroi se niset drejt Amerikës me të njëjtën bindje që kishte më shumë se tre dekada më parë, duke shpresuar në mbështetjen amerikane për shqiptarët.
“Kam shumë kënaqësi që sot nisem për në Shtetet e Bashkuara, me atë bindje që kisha në mars të vitit 1991. Besoj se vendi i madh i lirisë do të mbështesë Shqipërinë dhe shqiptarët në përpjekjet e tyre”, tha Berisha.
I pyetur për rëndësinë e kësaj vizite për Partinë Demokratike, ai hodhi poshtë idenë se bëhet fjalë për një përfitim personal. Sipas tij, vetë prania e gazetarëve dhe interesimi për udhëtimin tregojnë peshën që ai i atribuon vizitës.
Në planin personal, Berisha tha se gjatë qëndrimit në SHBA do të takohet me miqtë e tij, të cilëve, siç u shpreh, do t’u përcjellë një mesazh të thjeshtë: “Unë erdha”.
