Afrimi i zgjedhjeve lokale por edhe hartimi i një reformë të re administrativo-territoriale duket se i ka vënë në lëvizje bashkitë për të rritur perfomancën në mbledhjen e të ardhurave dhe për të treguar më shumë qëndrueshmëri ekonomike.
Në 7 muajt e parë të vitit reflektohet shtimi i ndjeshëm i arkëtimeve nga taksat dhe tarifat vendore që paguajnë qytetarët dhe bizneset.
Shifrat zyrtare të Ministrisë së Financave tregojnë se përgjatë periudhës Janar-Korrik 2026, bashkitë kanë mbledhur afro 39.7 miliardë lekë, ose rreth 430 milionë euro, duke regjistruar një rritje të fortë krahasuar me të njëjtën periudhë të një viti më parë.
Në raport me 7-mujorin e parë të vitit 2025, të ardhurat e pushtetit lokal janë rritur me rreth 17 miliardë lekë, ose 75.3%. Edhe kundrejt planit fillestar, bashkitë e kanë tejkaluar parashikimin me 1.1 miliardë lekë më shumë.
Peshën më të madhe në rritje e mbajnë të hyrat nga taksat lokale. Të kategorizuar sipas zërave, nga taksat lokale janë mbledhur rreth 33.1 miliardë lekë nga 17.3 miliardë lekë të mbledhura në janar-korrik 2025, duke u dyfishuar në raport me këtë periudhë. Ndërsa edhe në raport me planin, vihet re dyfishim i të ardhurave.
Nga taksa e pasurisë të ardhurat në 7 mujorin e parë 2026 janë realizuar në nivelin e 6.6 miliardë lekë apo rreth 72 milionë euro, me një rritje prej 1.3 miliardë lekësh apo 24.5% krahasuar me vjet.
Perfomancën më të mirë nga mbledhja e taksës së pasurisë, e kanë bashki si Himara, Cërriku, Vlora, Patosi, Elbasani, dhe Tirana.
Në strukturën e të ardhurave nga taksat vendore mbizotëron kontributi i të ardhurave nga dy taksa kryesore, të ardhurat nga taksa e ndikimit në infrastrukturë për ndërtimet e reja e cila zë 37 % të totalit, dhe të ardhurat nga taksa mbi pasuritë e paluajtshme (ndërtesa, tokë bujqësore dhe truall), përfaqësojnë afro 18 % të totalit të të hyrave vendore.
Rritjen më të madhe në burimet e të ardhurave të veta të pushtetit vendor e ka taksa e ndikimit në infrastrukturë. Bashkitë me rritjen më të madhe të të ardhurave nga kjo taksë janë Tirana, Vlora , Himara dhe Saranda, të cilat kanë dhe kërkesën më të lartë për ndërtime.
Rritja e fortë e të ardhurave nga kjo taksë reflekton kërkesën e lartë për zbatimin e projekteve ndërtimore, veçanërisht në zonat turistike dhe urbane. Këto të ardhura krijojnë mundësi shtesë për bashkitë në përmirësimin e shërbimeve dhe rritjen e investime në infrastrukturën lokale./SCAN
