"Pse duhet të shkrihemi", kryebashkiaku i Patosit ngre "kartonin e kuq" për reformën e Ramës

Kryetari i Bashkisë Patos, Fation Duro, ka reaguar përmes një postimi në rrjetet sociale ndaj debatit për reformën e re territoriale, duke dërguar një mesazh kritik ndaj argumenteve që po përdoren për riorganizimin e pushtetit vendor.

Pa e përmendur drejtpërdrejt kryeministrin Edi Rama apo projektin për bashkimin e mundshëm të Patosit me Bashkinë Fier, Duro ka publikuar të dhëna nga raporti përfundimtar i Komisionit për Reformën Territoriale, për të argumentuar se bashkia që ai drejton nuk mund të konsiderohet një njësi me performancë të dobët.

Në reagimin e tij, Duro thekson se argumenti kryesor i reformës, se bashkitë e vogla nuk kanë kapacitete administrative dhe financiare për të përmbushur funksionet, nuk qëndron në rastin e Patosit. 

REAGIMI:

Patosi nuk është bashki me performancë të dobët

Raporti përfundimtar i Komisionit nuk e paraqet Patosin si një bashki që nuk arrin të kryej funksionet e veta. Përkundrazi, në treguesit më të rëndësishëm, Patosi renditet ndër bashkitë më të mira të Shqipërisë.

Patosi është i dhjeti në Shqipëri për funksionalitetin

Indeksi i Funksionalitetit të Bashkive, IFB, vlerëson elemente të tilla si:

* autonomia fiskale;

* ngurtësia e buxhetit;

* mbulimi i funksioneve;

* eficienca e stafit;

* detyrimet e prapambetura.

Patosi merr 71,7 pikë dhe renditet i dhjeti ndër 61 bashkitë. Raporti e konsideron nivel të lartë çdo rezultat mbi 65 pikë.

Argumenti zyrtar për konsolidimin territorial është:

Bashkitë e vogla nuk kanë kapacitet administrativ dhe financiar të ushtrojnë funksionet.

Por në rastin e Patosit, vetë të dhënat e raportit tregojnë të kundërtën.

Krahasimi brenda Qarkut Fier

Rang vendi Bashkia Popullsia 2023 IFB

10 Patos 18.227 71,7

15 Roskovec 16.332 65,2

16 Lushnjë 63.135 65,0

23 Divjakë 24.882 59

32 Fier 101.963 55,4

40 Mallakastër 15.838 50,4

Të dhënat tregojnë se Patosi ka:

* 16,3 pikë më shumë se Fieri;

* performancë më të lartë se çdo bashki tjetër e qarkut;

* rezultat të lartë edhe në shkallë kombëtare.

Pra,

Bashkia që propozohet të shkrihet ka performancë funksionale më të mirë se bashkia që propozohet ta përthithë edhe performancë funksionale më të lartë se të gjitha bashkitë e tjera të Qarkut Fier.

Cili është dështimi konkret funksional i Bashkisë Patos që kërkon heqjen e statusit të saj, kur Indeksi zyrtar i vet Komisionit e rendit të dhjetën në vend dhe dukshëm mbi Bashkinë Fier me të cilën do të bashkohet?