Publikuar më 02.09.2026 nga Shek

ITALI- Tre udhëtime në Meksikë, qindra mijëra euro të shpenzuara dhe një shpresë që nuk u shua deri në fund. Për familjen Abbasciano, beteja për të gjetur një trajtim për vajzën e tyre Bianca u kthye në një barrë gjithnjë e më të rëndë, ndërsa hetuesit tashmë po shqyrtojnë edhe këtë pjesë të historisë para tragjedisë së Pietralatës.

Luca Abbasciano dhe Valentina Pambianco, përkatësisht 43 dhe 42 vjeç, dhe vajza e tyre pesëvjeçare Bianca u gjetën të pajetë në banesën e tyre në rrugën dell’Antracite, në lagjen Pietralata të Romës. Bashkë me ta u gjet i ngordhur edhe qeni i familjes, Teo.

Hipoteza kryesore e hetimit është ajo e një vrasjeje-vetëvrasjeje. Në banesë u gjet edhe një pistoletë Glock, e cila rezulton se ishte e regjistruar dhe mbahej ligjërisht nga Luca. Hetuesit kanë sekuestruar gjithashtu një seri letrash të lëna nga çifti, të cilat tashmë janë pjesë e hetimit.

Bianca lindi në muajin e shtatë

Drama e familjes kishte nisur që në lindjen e vajzës. Bianca lindi më 13 nëntor 2020, rreth dy muaj para kohe, në muajin e shtatë të shtatzënisë. Sipas raportimeve italiane, që në momentet e para gjendja e saj ishte kritike. Më vonë vajza u diagnostikua me paralizë cerebrale, dëmtime motorike dhe njohëse, si dhe epilepsi. Ajo nuk fliste, nuk ecte dhe kishte nevojë për ndihmë të vazhdueshme, ndërsa problemet e imunitetit e kishin çuar disa herë në spital. Nëna e saj, Valentina, kishte lënë punën në një kompani elektrike për t’iu përkushtuar tërësisht kujdesit ndaj vajzës. Luca, ndërkohë, punonte si teknik informatike.

Shpresa u zhvendos në Meksikë

Në kërkim të një mundësie për përmirësimin e gjendjes së Biancës, çifti u lidh me prindër të tjerë të fëmijëve me sëmundje të rënda dhe përmes tyre u njoh me trajtime të ofruara në Monterrey të Meksikës. Atje operonte klinika NeuroCytonix, e lidhur me neuroshkencëtarin meksikan José Roberto Trujillo.

Trajtimi, i njohur si Cytotron ose Neurocytotron, bazohet në përdorimin e radiofrekuencave dhe fushave elektromagnetike dhe paraqitet si një terapi eksperimentale për disa patologji neurologjike. Megjithatë, efektiviteti i kësaj terapie është vënë në pikëpyetje nga komuniteti shkencor. Raportimet italiane theksojnë gjithashtu se trajtimi nuk është i aprovuar nga FDA amerikane. Pavarësisht dyshimeve, për Luca dhe Valentina ajo u kthye në një nga shpresat e fundit për vajzën.

300 mijë euro për tre udhëtime

Sipas mikeshës së familjes, Feliciana Manna, prindërit e Biancës shkuan të paktën tre herë në Meksikë. Kostoja ishte marramendëse. “Çdo cikël kushton 70-80 mijë euro”, ka treguar Feliciana, duke sqaruar se shpenzimeve të trajtimit u shtoheshin edhe kostot e qëndrimit dhe udhëtimit.

Në total, sipas raportimeve, familja kishte shpenzuar rreth 300 mijë euro në përpjekje për të gjetur një zgjidhje për vajzën. Disa raportime flasin për shpenzime që i afroheshin 100 mijë eurove për udhëtim, ndërsa sipas mikeshës së familjes një cikël mujor kushtonte rreth 70-80 mijë euro, pa përfshirë qëndrimin.

“Rezultatet ishin minimale, por Valentina ishte gati të nisej sërish”

Një nga detajet më të forta që del nga dëshmitë e njerëzve pranë familjes lidhet me faktin se, pavarësisht kostos dhe rezultateve të kufizuara, nëna e Biancës nuk kishte hequr dorë nga shpresa. Feliciana ka treguar se rezultatet e trajtimeve, nëse kishte pasur, ishin minimale. Megjithatë, Valentina ishte ende e gatshme të kthehej në Meksikë. Sipas raportimeve, cikli i fundit i trajtimit ishte kryer mes nëntorit dhe janarit.

Nuk kërkuan para në internet

Ndryshe nga shumë familje që përballen me sëmundje të rënda të fëmijëve dhe organizojnë fushata publike për mbledhjen e fondeve, Luca dhe Valentina duket se kishin zgjedhur një tjetër rrugë. Ata nuk kishin hapur fushata publike për mbledhjen e parave.

Fillimisht përdorën kursimet e tyre, ndërsa më pas morën ndihmë nga familjarë dhe të afërm. Sipas raportimeve, për të siguruar paratë e nevojshme familja kishte shitur edhe disa prona. Por pas disa udhëtimesh dhe trajtimesh, burimet financiare duket se ishin konsumuar.

“Nuk kemi më para për ta kuruar Biancën”

Në sfondin e tragjedisë së fundit qëndron pikërisht edhe kjo krizë financiare. Sipas raportimeve të mediave italiane, familja ishte gjendur përballë një situate ku nuk kishte më burime për të vazhduar trajtimet që shpresonte se mund t’i ndihmonin vajzës.

Hetuesit po përpiqen të kuptojnë nëse shpenzimet e jashtëzakonshme, zhgënjimi nga rezultatet e trajtimeve dhe pamundësia për të vazhduar më tej kanë ndikuar në gjendjen psikologjike të çiftit. Për momentin, kjo mbetet pjesë e hetimit dhe nuk është përcaktuar si shkak i drejtpërdrejtë i tragjedisë.

Hetuesit kontrollojnë telefonat dhe kontaktet

Karabinierët po analizojnë tani edhe telefonat, mesazhet, kontaktet dhe telefonatat e çiftit. Qëllimi është të rindërtohet periudha e fundit e jetës së tyre dhe të kuptohet se me kë kishin komunikuar, kush i kishte orientuar drejt trajtimeve në Meksikë dhe nëse dikush kishte ushqyer te familja pritshmëri të pajustifikuara për shërimin e Biancës. Në fokus janë edhe mënyra se si familja kishte siguruar paratë për trajtimet dhe gjendja e tyre ekonomike në muajt e fundit.

Letrat e fundit dhe arma në banesë

Përpara tragjedisë, çifti kishte lënë pas një seri letrash për familjarë dhe miq. Sipas rindërtimeve të mediave italiane, bëhet fjalë për rreth 20 letra, të cilat tashmë janë marrë nga hetuesit dhe po analizohen për të kuptuar motivet që çuan në vendimin ekstrem. Në banesë u gjet pistoleta Glock e regjistruar në emër të Luca Abbascianos. Sipas hipotezës hetimore, Bianca u qëllua me armë, ndërsa më pas dy prindërit i dhanë fund jetës. Edhe qeni i familjes, Teo, u gjet i vrarë.

Një familje që kërkoi deri në fund një zgjidhje

Historia e familjes së Pietralatës tashmë po rindërtohet pjesë-pjesë nga hetuesit. Nga lindja e parakohshme e Biancës, te diagnoza e rëndë, vitet e kujdesit të vazhdueshëm, udhëtimet në Meksikë dhe qindra mijëra euro të shpenzuara për një terapi eksperimentale, deri te kriza ekonomike dhe tragjedia brenda banesës.

Ajo që po hetohet tani është nëse barra e sëmundjes së vajzës, dështimi i shpresave për një kurë, kostot e mëdha të trajtimeve dhe izolimi në të cilin ishte gjendur familja kanë luajtur rol në vendimin fatal.

Hetimet vijojnë dhe autoritetet italiane po përpiqen të rindërtojnë orët dhe ditët e fundit para tragjedisë, ndërsa letrat, telefonat dhe kontaktet e çiftit pritet të japin të dhëna të tjera për atë që ndodhi në shtëpinë e tyre në Pietralata./SHEKULLI