Publikuar më 02.09.2026 nga Shek

Gjermania ka ndërmarrë masa të forta ndaj Rusisë pas asaj që Berlini e konsideron një sulm hibrid të orkestruar nga Moska në territorin gjerman. Në qendër të zhvillimeve është aeroporti Leipzig/Halle, ku më 4 gusht u zbulua një dron i mbushur me eksploziv pranë një avioni ukrainas të transportit.

Pas hetimeve, qeveria gjermane ka dalë në përfundimin se Rusia qëndron pas përpjekjes për sulm, ndërsa Berlini e ka cilësuar ngjarjen si pjesë të një fushate më të gjerë operacionesh hibride ruse në Europë.

Droni me eksploziv pranë avionit ukrainas

Droni u gjet pranë një avioni ukrainas në aeroportin Leipzig/Halle. Autoritetet gjermane mbyllën përkohësisht pistat dhe përdorën një robot për çaktivizimin e pajisjes shpërthyese. Sipas autoriteteve, pajisja përmbante eksploziv të një niveli ushtarak, ndërsa qëllimi dyshohet të ketë qenë goditja e avionëve të transportit që operojnë në aeroport.

Ministri i Brendshëm gjerman, Alexander Dobrindt, tha se qeveria ka arritur në përfundimin se Rusia është përgjegjëse për sulmin hibrid në Leipzig. Sipas tij, operacioni kishte shenja të një niveli të lartë ekspertize teknike, ndërsa ekzekutimi dyshohet se iu besua agjentëve të nivelit më të ulët që vepronin në emër të strukturave shtetërore ruse.

Dy të dyshuar identifikohen

Sipas mediave gjermane Süddeutsche Zeitung, NDR dhe ËDR, hetuesit besojnë se kanë identifikuar dy burra të lidhur me planin. Njëri është me origjinë ruse dhe posedon pasaportë letoneze, ndërsa tjetri është nga Bjellorusia dhe mban pasaportë ruse. Të dy janë persona të njohur për autoritetet. Hetimet po vijojnë për të përcaktuar nëse ata kanë vepruar drejtpërdrejt për llogari të strukturave ruse dhe nëse pas tyre qëndron një rrjet më i gjerë.

Gjermania mbyll konsullatën ruse në Bonn

Pas akuzave ndaj Moskës, Gjermania ka vendosur të ndërmarrë masa diplomatike. Ministri i Jashtëm gjerman, Johann Ëadephul, njoftoi se konsullata e përgjithshme ruse në Bonn do të mbyllet më 18 shtator. Berlini ka vendosur gjithashtu t’i japë fund marrëveshjes me Russian House, qendrën ruse të shkencës dhe kulturës në Berlin. Ambasadori rus është thirrur në Ministrinë e Jashtme gjermane për të dhënë shpjegime.

“Rusia duhet të jetojë me pasojat”

Qeveria gjermane ka paralajmëruar se përgjigjja nuk do të kufizohet vetëm te masat diplomatike. Berlini kërkon sanksione të reja europiane ndaj Rusisë, kontrolle më të forta ndaj shtetasve rusë dhe masa kundër flotës së ashtuquajtur “shadoë fleet”, e cila përdoret për transportin e naftës ruse duke anashkaluar sanksionet. Ministri Ëadephul ka deklaruar se Rusia “duhet të jetojë me pasojat” e veprimeve të saj.

Alarm edhe për sabotime të tjera në Gjermani

Rasti i Leipzigut nuk po shihet si një incident i izoluar. Autoritetet gjermane po hetojnë edhe dyshime për përpjekje për ndërhyrje në infrastrukturën energjetike, përfshirë një incident në një nënstacion në Brandenburg. Hetuesit po shqyrtojnë nëse këto raste janë pjesë e së njëjtës fushatë sabotimi apo incidente të veçuara.

Kjo ka rritur shqetësimin në Berlin për atë që autoritetet e quajnë “luftë hibride” ruse, ku krahas luftës në Ukrainë përdoren sabotimet, sulmet kibernetike, ndërhyrjet në infrastrukturë dhe operacione të fshehta në vendet europiane.

NATO del në mbështetje të Gjermanisë

Sekretari i Përgjithshëm i NATO-s, Mark Rutte, ka shprehur solidaritet të plotë me Gjermaninë. Ai tha se Rusia është bërë “gjithnjë e më e pamatur”, duke përmendur jo vetëm incidentin në Leipzig, por edhe rritjen e numrit të dronëve dhe raketave që kalojnë në hapësirën ajrore të vendeve të krahut lindor të NATO-s. Rutte paralajmëroi gjithashtu për rritjen e aktiviteteve armiqësore ndaj territorit europian, përfshirë zjarret në fabrika që prodhojnë pajisje mbrojtëse për Ukrainën.

BE: Do të rrisim presionin ndaj Moskës

Presidentja e Komisionit Europian, Ursula von der Leyen, e cilësoi incidentin e Leipzigut si një përshkallëzim të ri në territorin e BE-së. Ajo tha se sulmi, nëse do të kishte sukses, mund të kishte shkaktuar dëme të mëdha dhe viktima. Von der Leyen deklaroi se BE-ja nuk do të kufizohet në ruajtjen e sanksioneve ekzistuese, por do të rrisë presionin ndaj Rusisë dhe do të mbyllë boshllëqet që Mosksës. /SHEKULLI