Publikuar më 03.09.2026 nga Shek

TIRANË- Kryeministri Edi Rama mblodhi sot grupin parlamentar dhe ministrat, në një takim ku në fokus kryesor ishin platformat e reja të prezantuara nga socialistët, Pasqyrë Albania dhe Prania Besnike. Rama tha se përmes Pasqyrë Albania, qytetarët do të kenë mundësi në kohë reale që të kontrollojnë aktivitetin e qeverisë, ndërsa aty do të shohin me dokumente mënyrën sesi institucionet veprojnë. Po ashtu Rama ftoi dhe pushtetin legjislativ dhe atë gjyqësor që të përfshihen në këtë platformë, që do të jetë më e madhe se vetë ealbania.

“‘Pasqyrë Albania’ është një kontratë kushtetuese e qytetarit me shtetin, ku qytetari nuk gjen çfarë tha qeveria sot, por gjen çfarë po bën qeveria në emrin e tij, gjen pse qeveria po merr një vendim, gjen kush e ka në dorë një çështje që mund t’i interesojë; gjen mbi cilin ligj dhe mbi cilin dokument mund të provojë apo të konsultojë atë që i duhet”, u shpreh mes të tjerave Rama.

Ndërkohë që sa i takon Pranisë Besnike, kreu i qeverisë urdhëroi deputetët socialistë, që çdo të premte të jenë në terren, në mënyrë që të dëgjojnë qytetarët mbi shqetësimet që ata kanë. Rama tha se këto takime nuk do të jenë për efekt elektoral, por do të shërbejnë për disiplinimin e institucioneve, dhe qytetarët vetëm do të dëgjohen, pa iu premtuar favore në këmbim.

“Çdo të premte në orën 5, deri sa unë të jem kryetar i PS, do të keni praninë besnike. Të gjithë, në territor, pranë njerëzve. Jo për mbledhje, ku vijnë njerëzit, flasin dhe fillojmë flasim. Prania besnike është dëgjim me radhë, ballë për ballë, tek për tek, me zë të ulët”, tha kryeministri.

Sipas kreut të qeverisë, takimet duhet të shërbejnë për të dëgjuar shqetësimet e çdo qytetari pa asnjë lloj dallimi apo favorizimi politik, ndërsa tha se fotoja me të pranishmit mund të bëhet vetëm me aprovimin e tyre.

“Të vijë kushdo të qajë hallin, të flasë tek për tek, dhe të mbajë shënim hallin që robi i zotit po flet. Pa kamera. Vetëm me foto në fillim të takimit nëse personi pranon, dhe pa ekspozim fytyre. Refuzohet përkatësia partiake, nuk ka rëndësi.”

Gjithashtu, Rama u bëri thirrje të prerë ligjvënësve socialistë që të mos kthehen në ndërmjetës apo të shkelin rregullat për të premtuar zgjidhje të jashtëligjshme, por të ndjekin rrugën zyrtare.

“Mos jepni shpresë për ndihmë jashtë rregullave. Deputeti nuk kthehet sekser, të mos marrin asnjë drejtor në telefon, por të dërgojë me shkrim institucional hallin e qytetarit”, u shpreh ai.

“Prania besnike nuk matet me video, se nuk do të ketë kamera, as me foto, prania besnike nuk jep premtime, nuk jep numrin e telefonit, por është një kompjuter që mban shënim, ata që ne vetëm do ti dëgjojmë. Do miratojmë një modul të matjes së punës së deputetit, në këtë botë të re, ku ne jetojmë në fakt mes dy botësh, asaj të realitetit fizik, dhe të asaj të pasqyrave”, vijoi Rama fjalën e tij.

Ndërkohë Rama nuk i kurseu as batutat dhe kritikat për deputetët e tij, ndërsa paralajmëroi se do të propozojë që çdo ndërhyrje e një deputeti me telefon për të futur dikë në punë të konsiderohet vepër penale. “Do ta propozoj dhe do t’ju shikoj të gjithëve në sy dhe do t’ju kërkoj ta votoni”, u shpreh Rama.

Sipas tij, çdo mesazh apo ndërhyrje me qëllim favorizimin e një personi për një vend pune duhet të konsiderohet një shkelje e rëndë.

“Çdo mesazh ‘fute këtë në punë’, ‘shikoje pak atë’, duhet të konsiderohet vepër penale, sepse një deputet që bën këtë nuk është i denjë të jetë përfaqësues i atyre mijëra qytetarëve të tjerë që nuk kanë akses te ËhatsApp-i i tij, që nuk janë pjesë e trungut të familjes së tij, që nuk janë pjesë e tarafit të tij apo shoqërisë së tij”, tha Rama.

Duke iu referuar votuesve të PS, ai tha se “këta janë njerëz që i kanë rritur fëmijët e tyre me një mijë e një mundime, që kanë votuar këtë deputet apo deputetë të tjerë me radhë dhe, në fund, shikojnë fëmijën e tyre të parakalohet nga një mesazh në WhatsApp. Vepër penale”./SHEKULLI