Mitsotakis do të prezantojë planin për rritjen e të ardhurave, përpara zgjedhjeve

Kryeministri grek Kyriakos Mitsotakis do të njoftojë të shtunën masa me vlerë më shumë se 2 miliardë euro (2.33 miliardë dollarë), përfshirë lehtësime fiskale, rritje pagash dhe masa të tjera mbështetëse, u shprehën zyrtarët grekë, ndërsa ai përpiqet të rikuperojë terren të humbur në sondazhet e opinionit përpara zgjedhjeve të vitit të ardhshëm.

Qeveria e tij e qendrës së djathtë, e cila u rizgjodh në vitin 2023 me 40.5% të votave, duke premtuar rritjen e të ardhurave, vijon të kryesojë në sondazhet e opinionit, por mbështetja për të ka rënë në rreth 29%, mes një krize të zgjatur të kostos së jetesës dhe akuzave për korrupsion.

Masat, të cilat Mitsotakis do t’i prezantojë gjatë fjalimit të tij vjetor për politikën ekonomike të shtunën, janë të barabarta me 1% të PBB-së dhe do të përfshijnë rritje pensionesh, një rritje të re të pagës minimale, lehtësime fiskale për të vetëpunësuarit dhe bizneset e vogla, si dhe masa lehtësuese për fermerët, thanë tre zyrtarë të qeverisë.

“Masat do të përfshijnë pothuajse të gjitha grupet shoqërore dhe fermerët, pa vënë në rrezik shëndetin fiskal të vendit”, tha njëri prej zyrtarëve, pa dhënë detaje të tjera.

Rritja e fortë ekonomike, një suficit buxhetor më i lartë se sa pritej dhe mbledhja më gjithëpërfshirëse e taksave do të ndihmojnë në financimin e paketës, e cila do të hyjë në fuqi në vitet 2026 dhe 2027, thanë ata.

Disa nga lehtësimet fiskale do të shtrihen në një periudhë katërvjeçare, tha një zyrtar i dytë.

Ekonomia e Greqisë po zgjerohet me një normë vjetore prej 2%, duke tejkaluar mesataren e eurozonës. Vendi pret një suficit primar me vlerë rreth 4% të Prodhimit të Brendshëm Bruto këtë vit, pothuajse dyfishi i parashikimit fillestar, duke krijuar hapësirën e nevojshme fiskale për financimin e masave të reja.

Megjithatë, papunësia është në nivelin 7.9%, krahasuar me mesataren prej 6.1% në BE, ndërsa PBB-ja për frymë, e matur sipas fuqisë blerëse, është ndër më të ulëtat në bllok.

Të ardhurat mesatare mujore mbeten në nivelin prej 1,500 eurosh, të njëjtë me nivelet para krizës të vitit 2009, sipas të dhënave të Ministrisë së Punës, ndërsa çmimet e ushqimeve, energjisë dhe qirave të banesave janë të paktën 30% më të larta që atëherë.

Në dhjetor, mijëra fermerë dolën në rrugë për të protestuar për çmimet e ulëta të produkteve të tyre, kostot e larta të energjisë dhe një skandal mashtrimi me fondet e ndihmës për bujqësinë, i cili shkaktoi dorëheqje politike dhe solli një gjobë të majme nga BE-ja.

Sindikatat e punëtorëve kanë planifikuar protesta në Selanik të shtunën në mbrëmje, duke kërkuar rritje më të mëdha të pagave dhe ulje të çmimeve për mallrat e përditshme dhe energjinë.