Prokuroria e Posaçme, SPAK njoftoi të mërkurën më 22 korrik përfundimin e hetimeve për një prej fraksioneve të çështjes së quajtur “Metamorfoza” dhe kërkon gjykimin e 9 personave të akuzuar si anëtarë të grupit kriminal, vrasje, sigurim të kushteve për vrasje dhe korruptim të funksionarëve të drejtësisë.
Ervis Martinaj, i cili rezulton i zhdukur prej katër vitesh, së bashku me të pandehurin Denis Brajoviq, akuzohen për vrasje me paramendim të Gjin Ndoj Boriçit, ngjarje e ndodhur më 9 gusht të vitit 2020 në qytetion e Shkodrës. Martinaj dhe i pandehuri Klador Hakaj akuzohen dhe për sigurimin e kushteve e mjeteve për të vrarë Kleant Musabelliun.
Ndërkohë, Brajoviq dhe të pandehurit, Nuredin Dumani, Prekë Kodra, Aleks Ndreka e Bardhyl Mavraj akuzohen se kanë bashkëpunuar për sigurimin e kushteve e mjeteve për vrasjen e Dorian Dulit dhe Ibrahim Liçit.
Të pandehurit Eljon Hato dhe Arsad Bashli akuzohen për tentativën e vrasjes së Taulant Pepës në shkurt të vitit 2021 në qytetin e Shkodrës, korrupsion të funksionarëve të drejtësisë dhe mbajtje pa leje të armëve luftarake. Për korrupsion aktiv të funksionarëve të drejtësisë akuzohet dhe i pandehuri Bardhyl Mavraj.
Përveç të pandehurve Eljon Hato dhe Arsad Bashli, të gjithë të pandehurit akuzohen edhe për veprat penale “Grup i strukturuar kriminal” dhe “Pjesëmarrje në grup të strukturuar kriminal”.
SPAK bënë me dije se ka ndarë çështjen për hetimin e bashkëpunëtorëve të tjerë në këto ngjarje e veprimtari kriminale.
