Gjykata e Tiranës e Shkallës së Parë e Juridiksionit të Përgjithshëm vendosi të martën më 21 korrik, deklarimin fajtor për “shpërdorim detyre” të dy ish-zyrtarëve të Agjencisë së Mbikëqyrjes Policore, AMP, Artjol Saliasi e Gëzim Sala, pasi punësuan në kundërshtim me ligjin Muçi Shaljanin, i cili mbeti i vrarë së bashku me Gilmando Danin në një atentat ndaj tyre të kryer pranë Aeroportit të Rinasit më 11 nëntor të vitit të kaluar. Gilmando Dani njihej si krahu i djathtë i Emiljano Shullazit.
Ndaj ish-zv/drejtorit të Përgjithshëm të AMP-së, Artjol Saliasi dhe ish-drejtorit të Financës dhe Shërbimeve Mbështetëse në këtë institucion, Gëzim Salës, u vendos dënimi me nga 9 muaj burgim dhe në aplikim të gjykimit të shkurtuar dënimi përfundimtar me 6 muaj heqje lirie.
Ndërkohë, gjykata vendosi pezullimin e ekzekutimit të dënimeve të tyre dhe i vendosi në shërbim prove për 1 vit, me kusht që të mos kryejnë vepër tjetër penale.
Nga hetimi dhe gjykimi kësaj çështjeje, u konkludua se Shaljani u pranua si agjent disa ditë pasi kishte kryer kërkesën, pa u kryer verifikimet e nevojshme të sigurisë. Sipas verifikimeve të prokurorisë, ai nuk është paraqitur asnjë ditë në punë, ndërkohë që është paguar.
