Grupi parlamentar i Partisë Demokratike njoftoi të mërkurën se ka ankimuar në Gjykatën Kushtetuese ligjin që ratifikon marrëveshjen e huasë prej 302 milionë dollarësh me Shtetet e Bashkuara për blerjen e pajisjeve ushtarake, duke kërkuar shfuqizimin e tij si antikushtetues.
Kjo hua jepet në kuadër të programit amerikan të Financimit të Jashtëm Ushtarak (FMF) dhe vjen në një moment kur Shqipëria po përpiqet të rrisë profilin e saj në fushën e mbrojtjes dhe sigurisë, ndërsa synon që të organizojë në Tiranë samitin e ardhshëm të NATO-s.
Mazhoranca tha se fondi do të shtrihet në 12 vjet dhe do të përdoret për forcimin e kapaciteteve mbrojtëse të vendit, ndërsa teksti u mbajt konfidencial dhe kaloi me procedurë të kontestuar nga opozita, e cila nuk mori pjesë në votim.
Në ankesën e deputetëve demokratë pretendohet se Kuvendi ka bërë 7 shkelje proceduriale për miratimin e ligjit në seancën e së hënës me procedurë të përshpjetuar brenda 3 orëve nga njoftimi i deputetëve për aktin ligjor.
Duke njoftuar vendimin e opozitës për ta ankimuar, kreu i grupit, Gazment Bardhi, tha për mediat se opozita mbështet në parim marrëveshjen, pasi lidhet me modernizimin e Forcave të Armatosura dhe detyrimet e Shqipërisë në NATO, por kundërshton procedurën e ndjekur nga mazhoranca për miratimin e saj.
Sipas Bardhit, Kuvendi ka shkelur shtatë dispozita kushtetuese dhe të Rregullores, duke u mohuar deputetëve kohën për t’u njohur me tekstin e marrëveshjes, dokumentacionin financiar dhe të drejtën për debat dhe amendamente.
Ai argumentoi se projektligji u fut në rendin e ditës dhe u miratua brenda të njëjtës ditë, pa respektuar afatet minimale të përcaktuara nga Kushtetuta dhe vendimet e mëparshme të Gjykatës Kushtetuese.
Opozita e kundërshtoi këtë proces në seancën plenare duke kërkuar mirëkuptimin e kryetarit të Kuvendit që të ndiqej procedura e rregullt.
“Për fat të keq, në fund nuk vendosi as Kushtetuta, as arsyeja, as mirëkuptimi,” tha Bardhi, duke shtuar se Kuvendi kishte luajtur edhe një tjetër herë rolin e noterit të qeverisë.
PD pretendon gjithashtu se qeveria krijoi artificialisht një procedurë urgjente, ndonëse marrëveshja ishte miratuar në parim më shumë se një muaj më parë, si dhe i hoqi opozitës mundësinë për të kërkuar kontroll kushtetues të marrëveshjes përpara ratifikimit.
Një tjetër argument lidhet me klasifikimin si sekret të marrëveshjes, pasi sipas Bardhit, mungesa e botimit në Fletoren Zyrtare e bën të pamundur hyrjen e saj në fuqi, në kundërshtim me kërkesat kushtetuese për marrëveshjet ndërkombëtare.
Gjithashtu, PD publikoi të mërkurën të dhëna, sipas të cilave, vetëm 27 nga 140 deputetët kishin nënshkruar deklaratat e konfidencialitetit për t’u njohur me marrëveshjen, ndërsa nga 74 deputetët që votuan pro ratifikimit të saj, vetëm 19 rezultojnë të kenë pasur akses në dokument.
