Ministri për Evropën dhe Punët e Jashtme, Ferit Hoxha, mori pjesë në takimin informal të Ministrave për Çështjet Evropiane, organizuar në Dublin nga Presidenca irlandeze e Këshillit të Bashkimit Evropian.
Në sesionin kushtuar zgjerimit të BE-së, mbështetjes së reformave dhe forcimit të kapaciteteve administrative, Ministri Hoxha ndau përvojën e Shqipërisë me procesin e negociatave, duke theksuar se suksesi ynë është ndërtuar mbi një përgjegjësi të fortë, objektiva të qarta dhe ambicioze, si dhe me mbështetje të vazhdueshëme nga BE-ja dhe vendet anëtare.
“Që çdo gjë të ketë sukses në një proces aq të vështirë sa anëtarësimi në BE, vullneti i fortë politik është i domosdoshëm. Ne po përparojmë në çdo çështje, në çdo sektor dhe përmes çdo reforme. Anëtarësimi në Bashkimin Evropian nuk ka qenë kurrë i lehtë. Megjithatë, sot procesi është më i kërkuar dhe më kompleks se kurrë. Prandaj është thelbësore të ruhet ritmi i reformave, të ruhet momenti në negociata dhe të sigurohet angazhim i vazhdueshëm në çdo nivel. Koha është thelbësore, si për kandidatët ashtu edhe për besueshmërinë e procesit dhe të BE-së”, nënvizoi Hoxha.
Ministri shtoi se jemi plotësisht të vetëdijshëm për fushat ku kërkohen përpjekje të mëtejshme, veçanërisht në lidhje me forcimin e mëtejshëm të sundimit të ligjit, por edhe në sektorë të tillë si menaxhimi i mbetjeve dhe ujërave, cilësia e ajrit, infrastruktura mjedisore dhe siguria ushqimore.
“Këto sfida kërkojnë koordinim të fortë, angazhim afatgjatë dhe investime të konsiderueshme. Procesi i anëtarësimit ka nevojë për të gjithë energjinë që mund të marrë, si në vend ashtu edhe nga partnerët tanë evropianë. Bashkëpunimi ynë duhet të bëhet më operacional, më konkret dhe më i qëndrueshëm”, deklaroi Hoxha.
“Siç e kemi theksuar më parë, gjetja e mënyrave praktike për të lidhur ekspertët shqiptarë, sa më ngushtë dhe sa më shpesh të jetë e mundur, me strukturat dhe proceset e punës së Komisionit dhe BE-së do të na lejonte të përfitonim nga ekspertiza e çmuar, duke forcuar më tej kapacitetin tonë administrativ dhe, më e rëndësishmja, duke thelluar njohjen me mënyrën se si funksionojnë institucionet e BE-së. Kjo do të ndihmonte që procesi i anëtarësimit të ishte një përshpejtues i vërtetë i transformimit administrativ”, tha ai.
Për Ministrin e Jashtëm, Shqipëria ka hyrë në një fazë vendimtare të procesit në rrugën drejt BE-së.
“Ambicia jonë është e qartë, planet tona të punës janë realiste dhe vendosmëria jonë e fortë. Ne do të vazhdojmë të japim rezultate dhe presim të njëjtin angazhim nga Bashkimi Evropian. Momenti politik për zgjerimin nuk ka nevojë për advokim. Fjalët kyçe mbeten të njëjta: zbatimi i reformave nga kandidatët dhe njohja e duhur e progresit nga shtetet anëtare”, përfundoi ai.
