Ish-banori i Big Brother VIP Kosova, Laurent Krasniqi, ka humbur jetën si pasojë e një aksidenti me motor, të regjistruar mbrëmjen e së mërkurës në Prishtinë.
Aksidenti ka ndodhur mbrëmjen e 2 shtatorit në fshatin Llukar të Prishtinës. Policia e Kosovës ka bërë të ditur se rasti është raportuar rreth orës 20:20 dhe se në aksident janë përfshirë një motor dhe një automjet.
Krasniqi, 29 vjeç, është transportuar nga ekipi i Ndihmës së Shpejtë drejt Qendrës Klinike Universitare të Kosovës pa shenja jete.
Sipas mediave në Kosovë, në momentin e aksidentit me Laurent Krasniqin ndodhej edhe partnerja e tij. Ajo ka pësuar lëndime të rënda dhe ndodhet në gjendje të rëndë shëndetësore. Megjithatë ky informacion nuk është konfirmuar deri tani zyrtarisht nga Policia e Kosovës apo QKUK-ja.
Laurent Krasniqi ishte një emër i njohur për publikun në Kosovë. Ai kishte fituar popullaritet në rrjetet sociale si TikTok-er dhe komedian, ndërsa më pas u bë pjesë e “Big Brother VIP Kosova”.
