Dy shpërthime me lëndë plasëse, tritol, janë regjistruar gjatë natës në qytetin e Durrësit.
Sipas njoftimit zyrtar të policisë, rreth orës 03:50, në lagjen nr. 11 të Durrësit, një sasi e vogël lënde plasëse është hedhur në derën e jashtme të një lokali në pronësi të shtetasit G. K.
Si pasojë e shpërthimit janë shkaktuar vetëm dëme të lehta materiale.
Ndërkohë, rreth 40 minuta më vonë, në orën 04:30, një tjetër shpërthim është regjistruar në zonën e Shkallnurit.
Sipas policisë, një sasi lënde plasëse është hedhur në derën e garazhit të një automjeti, në anë të rrugës Plepa–Ndroq, duke shkaktuar dëme materiale.
Grupet hetimore, nën drejtimin e Prokurorisë, po vijojnë veprimet për mbledhjen dhe administrimin e provave, me qëllim zbardhjen e plotë të rrethanave të dy ngjarjeve, si dhe identifikimin dhe kapjen e autorit ose autorëve.
