Allison Guerriero, ish-partnerja e Charles McGonigal, ish-drejtorit të kundërzbulimit të FBI-së në Nju Jork, është gjetur e vdekur në banesën e saj në Florida.
Vdekja e 52-vjeçares është raportuar nga “Daily Mail”, e cila thekson se Guerriero kishte denoncuar më herët aktivitetet e ish-zyrtarit të FBI-së tek autoritetet amerikane.
Sipas Daily Mail, Guerriero ndërroi jetë vetëm disa orë pasi kishte publikuar një numër të madh postimesh në rrjetin social X.
Të enjten, ajo kishte publikuar rreth 75 postime, mes tyre edhe një video ku shfaqej duke ecur në rrugë dhe kërkonte që vëmendja të përqendrohej edhe te zyrtarë të tjerë federalë. Në një tjetër postim, ajo kishte shkruar: “I hate the FBI” (e urrej FBI).
Ish-partnerja që foli për McGonigalin
Emri i Allison Guerrieros ishte bërë i njohur në kuadër të hetimeve ndaj Charles McGonigal, ish-zyrtarit të lartë të FBI-së, i cili përfundoi në qendër të një prej skandaleve më të mëdha që kanë prekur institucionin amerikan të drejtësisë.
Guerriero kishte qenë në një marrëdhënie me McGonigalin dhe më pas kishte komunikuar me autoritetet amerikane lidhur me aktivitetet e tij.
Dëshmitë e saj morën rëndësi të veçantë edhe për shkak të informacionit që ajo dha për udhëtimet e McGonigal në Shqipëri dhe kontaktet e tij me kryeministrin Edi Rama.
“Po shkonte në Shqipëri për t’u takuar me Ramën”
Guerriero kishte deklaruar se McGonigal i kishte treguar se do të udhëtonte drejt Shqipërisë për t’u takuar me kryeministrin Edi Rama.
“Ai po shkonte në Shqipëri për t’u takuar me kryeministrin Edi Rama”, kishte deklaruar ajo, duke sqaruar se nuk i ishte bërë e ditur arsyeja e saktë e takimit.
Sipas deklarimeve të saj, McGonigal fliste shpesh për kryeministrin shqiptar dhe kishte një marrëdhënie personale me të.
Guerriero kishte folur gjithashtu për udhëtimet e ish-zyrtarit të FBI-së në Shqipëri dhe kontaktet që ai kishte pasur gjatë këtyre vizitave.
Dosja që përfshiu edhe Shqipërinë
Deklarimet e Guerrieros morën një tjetër peshë pas publikimit të aktakuzës amerikane ndaj McGonigal.
Ish-drejtori i kundërzbulimit të FBI-së në Nju Jork u përball me akuza federale në SHBA për çështje që lidhen me fshehjen e marrëdhënieve financiare dhe marrjen e pagesave nga persona me interesa të huaja.
Në një prej proceseve, McGonigal u dënua me burgim në SHBA.
Çështja e tij tërhoqi vëmendje të madhe edhe në Shqipëri, pasi aktakuzat amerikane përfshinë referenca për kontaktet e tij me Edi Ramën dhe takimet e zhvilluara në Shqipëri.
Një prej linjave të hetimit amerikan lidhej me marrëdhënien e McGonigal me ish-zyrtarin shqiptar të inteligjencës Agron Nezën, nga i cili ai kishte marrë pagesa.
