Një 15-vjeçar ka ndërruar jetë në Prizren, pasi u sulmua me thikë gjatë orëve të vona të natës së mbrëmshme.
Sipas Policisë së Kosovës, i mituri u gjet i plagosur dhe mori ndihmën e parë në vendngjarje, përpara se të transportohej në Spitalin Rajonal të Prizrenit.
Por gjendja e tij ishte e rëndë dhe ai nuk arriti të mbijetojë për shkak të plagëve të marra.
Në kuadër të veprimeve të para hetimore, policia ka arrestuar një 17-vjeçar, gjithashtu i mitur, i cili dyshohet se është i përfshirë në ngjarje. Në kontrollin ndaj tij u gjet edhe arma e dyshuar e krimit, një thikë, e cila u sekuestrua si provë materiale.
Njësitë e hetimit dhe krim-teknikës kanë vijuar punën në vendngjarje, ndërsa Prokurori i Shtetit ka urdhëruar dërgimin e trupit në IML për obduksion.
Autoritetet bëjnë me dije se për shkak të moshës, as viktima dhe as i dyshuari nuk kishin precedentë të mëparshëm në evidencat policore.
