Ambasadori i SHBA-së në NATO, Matthew Whitaker, ka paralajmëruar se Rusia mund të paraqesë kërcënim edhe për vendet anëtare të Aleancës, duke thënë se deklaratat e fundit të presidentit rus, Vladimir Putin, nuk japin shumë arsye për optimizëm.
Whitaker deklaroi se Ukraina duhet të ketë kapacitetet e nevojshme për t’u mbrojtur për aq kohë sa është e nevojshme, deri në përfundimin e luftës.
I pyetur nëse Rusia mund ta sulmojë NATO-n, ambasadori amerikan tha se rreziku në afat të shkurtër mbetet i ulët, pasi forcat ruse vazhdojnë të jenë të angazhuara në luftën në Ukrainë.
Megjithatë, ai theksoi se një skenar i tillë nuk mund të përjashtohet plotësisht.
“Pushtimi rus i Ukrainës dhe aneksimi i mëhershëm i Krimesë na bëjnë të besojmë se Rusia mund të jetë e paparashikueshme dhe mund të jetë e gatshme të ndërmarrë veprime kundër një vendi të NATO-s”, tha Whitaker.
Paralajmërimi vjen në kohën kur aleatët perëndimorë po diskutojnë për forcimin e mbrojtjes së Ukrainës dhe rritjen e sigurisë në Evropë.
Sipas vlerësimit amerikan, përfundimi i luftës në Ukrainë mbetet një faktor kyç për uljen e rrezikut të përshkallëzimit dhe për të parandaluar zgjerimin e konfliktit përtej territorit ukrainas.
