Mitsotakis premton ulje taksash dhe pagë minimale prej 1 000 eurosh deri në vitin 2028

Kryeministri grek Kyriakos Mitsotakis ka njoftuar një plan katërvjeçar për të ulur taksat dhe për të rritur pagën minimale, një lëvizje që vjen përpara zgjedhjeve parlamentare të vitit 2027.

Mitsotakis e njoftoi këtë mbrëmë vonë në një fjalim në Panairin Ndërkombëtar të Selanikut, tradicionalisht një ngjarje e rëndësishme vjetore politike dhe ekonomike në Greqi, me premtimin e një “rritjeje të mirëqenies për të gjithë”, raporton Euraktiv.

Mitsotakis njoftoi një ulje të taksave për fermerët, të vetëpunësuarit, pensionistët dhe punonjësit në sektorin publik, si dhe një rritje graduale të pagës minimale në 1,000 euro deri në vitin 2028.

Ai i vuri theks të veçantë fermerëve, të cilët janë goditur rëndë nga vonesat në pagesa pas skandalit të fundit në lidhje me subvencionet e Bashkimit Evropian. Mitsotakis njoftoi heqjen e taksave për qytetarët me të ardhura vjetore më pak se 20,000 euro, ndërsa fermerëve të bagëtive iu premtua një kuadër gjithëpërfshirës për mbrojtje afatgjatë kundër sëmundjeve të kafshëve.

Kryeministri grek njoftoi gjithashtu futjen e llogarive të kursimit me afat të caktuar për çdo fëmijë të porsalindur.  Zgjedhjet e rregullta parlamentare në Greqi duhet të mbahen në vitin 2027, megjithëse ka spekulime rreth mundësisë së zgjedhjeve të parakohshme që këtë vit.

Dy zyrtarë të qeverisë greke i thanë Euractive në Selanik se, për momentin, skenari më i mundshëm është mbajtja e zgjedhjeve në mesin e majit 2027, vetëm pak javë përpara se Greqia të marrë përsipër presidencën e radhës të Këshillit të BE-së në korrik.

Sipas sondazheve të fundit të opinionit publik, partia në pushtet Demokracia e Re do ta ketë të vështirë të sigurojë shumicën absolute dhe të formojë një qeveri njëpartiake, prandaj mbajtja e një raundi të dytë zgjedhjesh është një mundësi e mundshme.