Agjencia Shqiptare e Zhvillimit të Investimeve (AIDA) ka ngritur alarmin për bizneset shqiptare që zhvillojnë ose synojnë të krijojnë marrëdhënie tregtare me kompani në Kinë, pas shtimit të rasteve me probleme financiare dhe kontraktore, ku vlerat e përfshira arrijnë deri në miliona euro.
Sipas AIDA-s, deri më tani janë raportuar 8 raste problematike, ndërsa dëmet apo vlerat financiare të përfshira në këto marrëdhënie shkojnë deri në miliona euro. Për këtë arsye, institucionet shqiptare u kërkojnë bizneseve të tregojnë kujdes të shtuar përpara se të marrin angazhime financiare me partnerë kinezë.
Paralajmërimi merr rëndësi të veçantë në kushtet kur një pjesë gjithnjë e më e madhe e kontakteve tregtare realizohen në distancë dhe përmes platformave online, duke e bërë më të vështirë verifikimin e menjëhershëm të kompanive dhe personave që paraqiten si përfaqësues të tyre.
AIDA ka publikuar edhe tetë hapa që bizneset shqiptare duhet të ndjekin për të ulur rrezikun. Fillimisht rekomandohet verifikimi i ekzistencës dhe statusit ligjor të kompanisë partnere, si dhe kontrolli i identitetit të personit që negocion apo nënshkruan dokumente në emër të saj.
Bizneset duhet të kontrollojnë gjithashtu adresën e regjistrimit të kompanisë, licencën dhe të dhënat bankare. Për kontratat me vlera të konsiderueshme këshillohet hartimi i marrëveshjeve të qarta dhe marrja e këshillimit juridik përpara nënshkrimit.
Sipërmarrjeve shqiptare u rekomandohet të shmangin parapagimin e plotë pa garanci të mjaftueshme dhe, kur është e mundur, të përdorin instrumente pagese që ofrojnë më shumë siguri dhe garanci bankare.
Institucionet kërkojnë vigjilencë të veçantë edhe kur një ofertë apo kontakt tregtar vjen vetëm nëpërmjet internetit ose rrjeteve sociale. Në këto raste, ekzistenca reale e kompanisë dhe identiteti i personave që negociojnë duhet të verifikohen përpara kryerjes së transfertave financiare.
Në fund, AIDA rekomandon që bizneset të ruajnë të gjithë dokumentacionin që lidhet me marrëdhënien tregtare, përfshirë kontratat, faturat dhe dokumentet e transfertave.
