Ministria e Mbrojtjes ka bërë bilancin e situatës së zjarreve në vend deri në orën 14:00.
Nga 11 vatra zjarri të raportuara, 5 prej të cilave vijojnë aktive, kurse 5 janë nën mbikëqyrje dhe një është shuar.
Situata më problematike paraqitet në Malin e Dajtit, ku vijon ndërhyrja në zonën mbi tunelet e Qafë Mollës. Në terren ndodhen 40 forca zjarrfikëse, 7 forca të ADZM dhe 20 efektivë të Forcave të Armatosura, të mbështetur nga helikopteri. Pavarësisht vatrave aktive, nuk raportohet rrezik për zonat e banuara.
Zjarri vijon edhe në Ballenjë të Dibrës, në një terren të vështirë shkëmbor, ndërsa një vatër aktive raportohet në Qafën e Helmës në Bulqizë.
Ndërkohë, Mali i Dardhës në Librazhd është riaktivizuar, me flakët që kanë përfshirë një sipërfaqe pyjore prej rreth 7–8 hektarësh. Edhe në këtë zonë nuk raportohen banesa të rrezikuara.
Në Valikardhë të Bulqizës, operacioni vijon me një automjet zjarrfikës dhe 6 efektivë, ndërsa era dhe temperaturat e larta favorizojnë përhapjen e flakëve.
Në operacionet për shuarjen dhe monitorimin e vatrave janë angazhuar 65 forca operacionale dhe 2 automjete zjarrfikëse, ndërsa Forcat e Armatosura kanë vënë në dispozicion 20 efektivë dhe një helikopter.
