Një konflikt fizik është regjistruar në zonën e Kakomesë, ku 46-vjeçari Gentjan Papagjika, banor i Sarandës, ka mbetur i plagosur pas një përleshjeje me një grup të rinjsh.
Sipas dëshmisë së Papagjikës, ai po filmonte me telefon zonën e plazhit kur një grup të rinjsh, që po lëviznin me makinë, kanë ndaluar pranë tij. Të rinjtë dyshohet se e kanë fyer dhe e kanë pyetur përse po filmonte.
“Pse filmon?”, mësohet t’i kenë thënë 46-vjeçarit, përpara se debati verbal të përshkallëzohej në konflikt fizik.
Si pasojë e përleshjes, Papagjika ka pësuar dëmtime dhe fraktura në trup. Fillimisht ai është dërguar për ndihmë mjekësore në Sarandë, ndërsa më pas është transportuar drejt Janinës, ku po merr trajtim të specializuar.
Mësohet se 46-vjeçari është me origjinë nga Nivica dhe, për shkak se disponon pasaportë greke, është dërguar për mjekim në Greqi.
Rrethanat e plota të konfliktit dhe identiteti i personave të përfshirë pritet të zbardhen nga hetimet e autoriteteve.
