Vetëm një muaj e gjysmë pas nisjes së funksionimit, terminali i ri i transportit publik në Sarandë është kthyer në shqetësim për qytetarët dhe operatorët e linjave ndërqytetëse.
Këtë të mërkurë, një grup qytetarësh, kryesisht të moshuar, por edhe shoferë, operatorë dhe udhëtarë të linjave që lidhin Sarandën me Delvinën, fshatrat e Finiqit dhe Konispolit, protestuan para Bashkisë së Sarandës.
Shkak i pakënaqësisë është zhvendosja e stacionit të autobusëve në terminalin e ri, rreth 1.5 kilometra larg qendrës së qytetit. Sipas protestuesve, autobusët nuk futen më në Sarandë, ndërsa udhëtarët detyrohen të përdorin transportin urban për të mbërritur në qendër.
Problemi kryesor, sipas tyre, është frekuenca e ulët e urbanëve, çka krijon vështirësi të mëdha veçanërisht për të moshuarit që vijnë nga zonat rurale për të marrë shërbime shëndetësore.
“Një i moshuar që vjen esëll për të bërë analiza, a mund të bëjë edhe një orë rrugë deri në spital?”, u shpreh një prej qytetarëve, duke kërkuar që institucionet të marrin parasysh nevojat e banorëve përpara se të ndryshojnë mënyrën e organizimit të transportit.
Përveç vështirësive me urbanin, protestuesit ankohen edhe për rritjen e kostove të udhëtimit. Sipas tyre, bileta nga zonat përreth Sarandës ka kaluar nga 1500 në 2000 lekë.
“Kjo është një rritje artificiale. Ne vijmë në Sarandë për punë dhe për shërbime”, tha një protestues.
Një tjetër kërkesë e ngritur gjatë protestës lidhet me linjën Sarandë–Delvinë. Banorët e konsiderojnë lidhjen mes dy qyteteve të domosdoshme për shkak të lëvizjeve të përditshme të punëtorëve dhe qytetarëve që kanë nevojë për shërbime në Sarandë.
Ata kërkojnë që kjo linjë të funksionojë me një organizim të ngjashëm me linjat urbane që lidhin Tiranën me zonat përreth, duke argumentuar se shumë banorë të Delvinës kanë ndërprerë punën në Sarandë për shkak të kostove dhe vështirësive të transportit.
Më herët, banorët e Delvinës kanë depozituar ankesat e tyre pranë institucioneve, ndërsa rreth 350 persona kanë firmosur një peticion kundër situatës së krijuar pas zhvendosjes së stacionit në terminalin e ri.
Për protestuesit, çështja nuk lidhet vetëm me funksionimin e terminalit, por me aksesin e qytetarëve në shërbimet bazë dhe kostot që sjell ndryshimi i skemës së transportit, veçanërisht për të moshuarit dhe familjet që varen çdo ditë nga transporti publik
