Një 53-vjeçar është arrestuar në flagrancë nga shërbimet e Komisariatit të Policisë Nr. 1, pasi dyshohet se ka qëlluar me armë zjarri në ajër, në afërsi të një lokali në fshatin Mullet të Tiranës.
Policia njofton se ngjarja dyshohet të ketë ndodhur pas një konflikti për motive të dobëta mes 53-vjeçarit, shtetasit F. Ç., dhe një 23-vjeçari, A. H., i cili ndodhej në ambientet e lokalit.
Autori ka qëlluar në ajër me një pistoletë, të cilën e posedonte pa leje, përballë lokalit ku ndodhej 23-vjeçari.
Dyshohet se veprimi është kryer me qëllim kanosjen e tij, për shkak të një konflikti të mëparshëm mes tyre.
Gjatë operacionit, shërbimet e Policisë sekuestruan në cilësinë e provës materiale armën e zjarrit, së bashku me municionin.
