Një tjetër dëshmi po ndihmon hetuesit për të rindërtuar ngjarjen e rëndë të 18 gushtit në Ksamil. Armando Zeneli, i cili punon si DJ në diskotekën “Principote”, është marrë në pyetje në cilësinë e personit që ka dijeni për veprën penale dhe ka treguar momentet pas përplasjes
Sipas dëshmisë së tij, rreth orës 05:00, Zeneli ka parë rojet e sigurisë duke vrapuar në drejtim të hyrjes së klubit. Pak më vonë, te pjesa e restorantit, atij i janë afruar disa kolegë pune të panikosur, të cilët i kanë kërkuar të merrte Sokrat Vatën dhe ta dërgonte në spital, pasi kishte makinën pranë.
Zeneli ka deklaruar se drejt tij është afruar Sokrat Vata, i cili ishte i gjakosur në të gjithë trupin dhe mbante dorën poshtë bluzës, në pjesën e barkut. Sipas dëshmisë, Vata i ka kërkuar disa herë që ta çonte në spital, duke i thënë të nxitonte
DJ ka njoftuar menaxherin për situatën dhe më pas ka vrapuar drejt parkimit për të marrë automjetin. Kur ka dalë jashtë lokalit, ka parë një grup turistësh që po i jepnin ndihmë një personi të shtrirë në tokë.Më pas, Zeneli ka marrë automjetin dhe, në pjesën e sipërme të lokalit, është shfaqur Sokrat Vata, i cili ka hipur në pjesën e pasme të makinës. Ata janë nisur menjëherë në drejtim të qendrës shëndetësore të Ksamilit.
Gjatë rrugës, sipas dëshmisë, Vata i ka kërkuar Zenelit të vazhdonte drejt. Pas dy ose tre minutash, kur kanë mbërritur në një rrugë me kalldrëm, ai i ka kërkuar të ndalonte dhe më pas ka zbritur nga makina dhe është larguar me vrap, i zbathur.
Zeneli ka deklaruar se, disa metra larg automjetit, ka vënë re se Vata kishte hedhur me forcë diçka në tokë. Pas këtij momenti, ai është larguar drejt banesës, ku ka qëndruar i tronditur nga ngjarja.
Pasi është qetësuar, Zeneli ka telefonuar policinë dhe u ka ofruar autoriteteve ndihmë për identifikimin dhe kapjen e Sokrat Vatës.
Dëshmia e tij pritet të jetë pjesë e materialeve hetimore që po përdoren për të sqaruar dinamikën e ngjarjes së rëndë në Ksamil dhe veprimet e personave të përfshirë.
“I është marrë deklarim në cilësinë e personit që ka dijeni për veprën penale shtetasit Armando Zeneli, i cili ka deklaruar se punon si DJ në disko “Principote” dhe se rreth orës 05:00 të datës 18.08.2026 ka parë rojet e sigurisë që iknin me vrap në drejtim të hyrjes së klabit.
Në vazhdim kur ka qenë te pjesa e restorantit kanë ardhur një grup kolegësh pune të panikosur të cilët i kanë thënë merre Sokratin dhe coje në spital se ti ke makinë këtu afër. Në drejtim të Armandos ka ardhur shtetasi Sokrat Vata i cili ishte i gjakosur kokë e këmbë dhe mbante dorën poshtë bluzës në pjesën e barkut dhe i ka thënë disa herë ku e ke makinën më ço në spital, nxito o k…r.
Armando kishte njoftuar menaxherin në lidhje me situatën dhe më pas ka ikur me vrap për të marrë makinën te parkimi dhe kur ka dalë jashtë ka parë një grup turistësh të cilët po i jepnin ndihmë një personi të shtrirë në tokë.
Armando ka marë makinën dhe në pjesën e sipërme të lokalit ka dalë Sokrati i cili kishte hipur në pjesën e mbasme të makinës dhe është nisur menjëherë në drejtim të qendrës shëndetësore të Ksamilit, ku Sokrati gjatë rrugës i tha ik vetëm drejt dhe mbas dy tre minutash kur shkuan në një rrugë me kalldrëmë Sokrati i ka thënë ndalo këtu dhe ka ikur zbathur.
Disa metra pak larg makinës Armandua kishte vënë re që Sokrati kishte hedhur dicka me forcë. Pas këtij momenti ka shkuar në banes i shokuar, ku pasi është qetësuar ka telefonuar policinë dhe ka ofruar ndihmë për kapjen e Sokratit”, thuhet në dosjen hetimore.
