Drejtori i Përgjithshëm i Policisë së Shtetit, Skënder Hita, ka zhvilluar një seri takimesh me strukturat e Drejtorive Vendore të Policisë në Elbasan, Berat dhe Kukës, në kuadër të masave për rritjen e parametrave të sigurisë në territor.
Në fokus të takimeve ka qenë forcimi i masave për parandalimin dhe goditjen e kriminalitetit, ndjekja në dinamikë e konflikteve dhe denoncimeve të qytetarëve, si dhe identifikimi dhe arrestimi i personave që qarkullojnë me armë zjarri apo janë të përfshirë në veprimtari të paligjshme në fushën e narkotikëve.
Hita ka kërkuar gjithashtu intensifikimin e punës për lokalizimin dhe kapjen e personave në kërkim, parandalimin e krimeve mjedisore dhe rritjen e standardeve të komunikimit me qytetarët, duke kërkuar etikë dhe profesionalizëm nga efektivët e Policisë.
Një vëmendje e veçantë iu kushtua sigurisë në shkolla, të cilën Hita e cilësoi si “prioritet mbi prioritetet” për Policinë e Shtetit.
Njoftimi:
Në kuadër të rritjes së parametrave të sigurisë, Drejtori i Përgjithshëm i Policisë së Shtetit, Drejtues Madhor Skender Hita, zhvilloi takime me strukturat e Drejtorive Vendore të Policisë Elbasan, Berat dhe Kukës.
Në fokus të takimeve ishte parandalimi i ngjarjeve kriminale, ndjekja në dinamikë e konflikteve dhe denoncimeve të qytetarëve, identifikimi dhe arrestimi i personave që qarkullojnë me armë zjarri apo ushtrojnë veprimtari në fushën e narkotikëve, lokalizimi dhe kapja e personave në kërkim, parandalimi i krimeve mjedisore, si dhe komunikimi me etikë dhe profesionalizëm me qytetarët.
Drejtues Madhor Hita, gjatë takimeve, vuri theksin te siguria në shkolla, e cila për Policinë e Shtetit është prioritet mbi prioritetet, dhe kërkoi nga strukturat që, me fillimin e procesit të ri mësimor, shërbimet e Policisë të jenë maksimalisht të angazhuara, në bashkëpunim me oficerët e sigurisë në shkolla, për garantimin e sigurisë së nxënësve dhe për të siguruar një proces mësimor sa më të qetë dhe të sigurt.
Më tej, Drejtori kërkoi që shefat e Komisariateve të ndjekin çdo ditë këtë prioritet dhe të trajtojnë vetë çdo shqetësim të adresuar nga shkollat që ka të bëjë me sigurinë e nxënësve.
Njëkohësisht, Sektorët e Narkotikëve, Shqiponjat dhe Operacionalet do të jenë të fokusuara në perimetrin e sigurisë, me qëllim që territori i shkollës të jetë i paprekshëm nga personat që tentojnë të shesin lëndë narkotike apo të shkaktojnë konflikte me nxënësit.
Ndërkohë, për rritjen e parametrave të sigurisë rrugore, kërkoi intensifikimin e monitorimit të qarkullimit rrugor, përfshirë përdorimin e mjeteve inteligjente, me qëllim parandalimin e aksidenteve dhe ndërhyrjen e menjëhershme në rast të evidentimit të shkeljeve.
Drejtori i Përgjithshëm kërkoi që çdo drejtues të mbajë përgjegjësi të drejtpërdrejtë për situatën e sigurisë në territorin që mbulon, duke ndjekur nga afër problematikat dhe duke garantuar reagim të shpejtë e profesional ndaj çdo shqetësimi të qytetarëve.
Ai kërkoi që shefat e Komisariateve dhe Drejtorët e Qarqeve të presin qytetarët, t’i dëgjojnë për shqetësimet dhe problemet që kanë dhe që janë pjesë e zgjidhjes nga Policia, pasi edhe ai vetë pret çdo qytetar që kërkon takim me të.
Takimet do të vijojnë në të gjitha Drejtoritë Vendore të Policisë dhe Drejtoritë Vendore për Kufirin dhe Migracionin.
