Ndërsa qeveria greke ka prezantuar një paketë masash që synon të rrisë të ardhurat e pensionistëve dhe punonjësve, si dhe të ulë barrën e kontributeve për punëtorët dhe bizneset, në Shqipëri Rama flet për “mrekulli ekonomike”, ndërsa masat për të përmirësuar jetët e shqiptarëve janë inekzistente.
Në Greqi, kryeministri Kyriakos Mitsotakis ka vendosur në qendër të paketës pensionistët, punonjësit e administratës dhe të paguarit me pagë minimale. Pensionistët do të marrin çdo vit një pagesë shtesë prej 400 eurosh, duke nisur nga nëntori 2026.
Numri i përfituesve do të rritet në rreth 2.2 milionë, pasi hiqen kriteret e të ardhurave dhe pasurisë. Kushti kryesor është që pensionisti të ketë mbushur 65 vjeç. Nga dhjetori 2026 do të hiqet përfundimisht mekanizmi i “diferencës personale”, duke u dhënë të gjithë pensionistëve rritjen e plotë vjetore.
Punonjësit e sektorit publik do të përfitojnë një bonus prej 500 eurosh bruto për Krishtlindje çdo vit, duke nisur nga dhjetori 2027. Masa shihet si rikthim i pjesshëm i pagës së 13‑të. Përveç kësaj, nga prilli 2027 pagat e administratës publike do të rriten me 30 euro.
Punonjësit e sektorit privat do të përfitojnë rritje të pagës minimale, e cila do të arrijë 950 euro në prill 2027 dhe synohet të shkojë në 1000 euro në janar 2028. Përfitime shtesë do të kenë punonjësit me vite përvojë, deri në +30% mbi pagën bazë.
Rama me Melonin, Mitsotakis me plan masash
Krejt ndryshe panorama në Shqipëri teksa Edi Rama ka zgjedhur prej kohësh të shfaqet si një lider me akses të drejtpërdrejtë në kancelaritë europiane dhe veçanërisht në marrëdhëniet me kryeministren italiane Giorgia Meloni, por për qytetarin shqiptar, pytja është e thjeshtë: Çfarë hyn në llogarinë bankare?
Qeveria e Ramës flet për rritje ekonomike, investime dhe suksese por hendeku në ekonominë shqiptare të narkoshtetit mes statistikës dhe përditshmërisë së qytetarit mbetet një nga betejat kryesore.
