18 minuta më parëTë dërguarit e Trump mbërrijnë në Kiev pas takimit me Putinin, Zelensky: Duam paqe, por na duhen garanci sigurie!
Periskopi(3 minuta më parë)
(3 minuta më parë)Të dërguarit amerikanë për paqen, Jared Kushner dhe Steve Witkoff, kanë mbërritur në Kiev dhe janë takuar me Presidentin ukrainas Volodymyr Zelensky, në kuadër të përpjekjeve të administratës Trump për t’i dhënë fund luftës në Ukrainë.
Sipas Reuters, vizita e së dielës shënon herën e parë që Kushner dhe Witkoff udhëtojnë në Kiev në cilësinë e negociatorëve amerikanë. Ata mbërritën në Ukrainë pas takimit me Presidentin rus Vladimir Putin në Moskë, ku të shtunën zhvilluan rreth tre orë bisedime.
Takimi me Putinin u cilësua nga ndihmësi i Kremlinit, Yuri Ushakov, si “shumë i dobishëm”, por nuk duket se solli një marrëveshje për t’i dhënë fund konfliktit.
Administrata Trump ka intensifikuar përpjekjet diplomatike për arritjen e një marrëveshjeje, pas disa raundeve të mëparshme të negociatave që kanë prodhuar pak rezultate. Presidenti Donald Trump tha të premten se SHBA-ja kishte një propozim të ri për paqen, por nuk dha detaje.
Në Kiev, të dy të dërguarit amerikanë zhvilluan takime me Zelensky-n dhe zyrtarë të tjerë të lartë ukrainas.
Përpara mbërritjes së tyre, Zelensky tha se Ukraina është e gatshme të punojë për t’i dhënë fund luftës, por theksoi se një marrëveshje duhet të përfshijë garanci sigurie dhe një paqe që ai e cilësoi si dinjitoze.
“Nevojiten garanci sigurie. Nevojitet një paqe dinjitoze pas luftës. Propozimet tona janë hartuar”, deklaroi Zelensky. /Panorama
