Rrjetet sociale, të konsideruara shpesh si një burim shpërqendrimi, po luajnë një rol të papritur në rikthimin e të rinjve te librat. Në TikTok, Instagram dhe YouTube, komunitetet BookTok dhe Bookstagram po e shndërrojnë leximin në një fenomen social, duke bërë që libra, autorë dhe zhanre të caktuara të bëhen virale.

Nga recensionet dhe rekomandimet, te videot me rafte librash dhe diskutimet mbi personazhet, përmbajtjet e lidhura me librat po krijojnë një komunitet të ri lexuesish. Për disa të rinj, kjo prirje ka sjellë edhe më pak kohë para ekranit dhe më shumë kohë me një libër në dorë.

Një prej tyre është 14-vjeçarja Mia nga Bristol, e cila thotë se rekomandimet e miqve dhe përmbajtjet e librave e kanë shtyrë të lexojë më shumë. Ajo veçon serinë Powerless të Lauren Roberts dhe thotë se leximi e ndihmon të largohet nga platformat e transmetimit dhe të hyjë në “një botë tjetër”.

Fenomeni nuk ka mbetur vetëm online. Libraritë kanë krijuar hapësira të posaçme për titujt e promovuar nga BookTok, ndërsa suksesi i këtij komuniteti ka ndikuar edhe në shitjet e librave.

Një shembull është Holly Irwin, e cila gjatë pandemisë zbuloi dashurinë për librat përmes sagës Twilight. Pasi llogaritë e saj në Instagram dhe TikTok u rritën në më shumë se 149 mijë ndjekës, ajo dhe nëna e saj hapën në Cirencester librarinë Hollyhocks, të specializuar në romane romantike.

Sipas të dhënave të cituara nga BBC, ndërsa shitjet e romancës ranë në vitin 2025 pas disa vitesh rritjeje të fortë, librat fantastiko-shkencorë dhe fantazia shënuan rritje rekord. Zhanri romantasy, që bashkon romancën me fantazinë, është ndër kategoritë që kanë përfituar më shumë nga kjo valë.

Kështu, një platformë e krijuar për video të shkurtra po i shtyn disa të rinj drejt një aktiviteti që kërkon kohë, përqendrim dhe imagjinatë. BookTok po dëshmon se, në vend që teknologjia ta zëvendësojë librin, ajo mund të bëhet ura që i çon lexuesit e rinj drejt tij./KultPlus.com